手錶近期大玩復古相信睇開錶嘅朋友應該都知道，而G-SHOCK近日就帶來MR-G系列最新款MRG-B5000BA-1，以日系「青墨（あおずみ）」作為主題，係一隻錶圈合共以25個獨立組件構成嘅旗艦級手錶。

今次嘅MRG-B5000BA-1，繼續以大路嘅黑色為主調，但卻加入日系「青墨（あおずみ）」，「青墨」係日本傳統用於書法及繪畫嘅用色，其偏藍色調總係會讓人有一種純然寧靜嘅感覺，將呢種色調放上手錶，就係成熟嘅感覺。

MRG-B5000BA-1 標誌性磚形錶面圖案其實係向原創 G-SHOCK DW-5000C 致敬，不過唔同於 GMW-B5000 使用一體成型嘅錶圈，MRG-B5000 系列嘅錶圈總共以25個獨立組件構成，備有四角懸掛組件及矽膠緩衝，吸震性能絕對唔係講少，真係唔小心整跌都唔使咁擔心。

而工藝層面就更加唔使講，其大師級工匠於難以拋光嘅表面，包括凹槽、凹陷和倒角邊緣作細膩嘅飾面處理，將 Sallaz 拋光處理應用於每個組件上，令手錶具有絕無變形嘅飾面。