瑞士Watch & Wonders錶展今日正式開鑼，各大錶廠都如倒水一樣公佈新錶，而最受大家注目嘅Rolex當然亦唔例外。其中，今年迎來60週年嘅Cosmograph Daytona，就會作出系列更新。

從正面睇，新款Daytona同舊款分別不大，官方新聞稿話「錶盤得到新的圖像平衡，和諧的色彩組合突出了錶盤與小錶盤的對比」，具體啲就係小錶盤個外圈，似乎比起舊款要幼些少。另外錶殼設計亦有更新，錶耳及錶側線條有修正。而外觀上最大嘅分別，就係更新後嘅陶瓷(Cerachrom) 錶圈略為收窄，最外沿會多咗一條與錶殼材質相當嘅「邊」，同時亦令腕錶睇落比起以往更大——但實際大細係冇變，依然係40mm。

另一重大改變，就係Daytona終於換錶芯。新嘅4131自動上鍊機芯，利用比起4130機芯更少嘅部件得到相同效果及功能，換言之就即係可靠性提高咗。而且或者係想展示新錶芯，所以新款Daytona首次換上藍寶石水晶底蓋，換言之大家隨時都可以欣賞到機芯夾板上新嘅「勞力士日內瓦」波紋。

除咗更新系列之外，Rolex亦乘Daytona系列60週年宣佈推出「鉑金冰藍面」(ref.125606)，外表同50週年推出嘅鉑金冰藍面相差無幾，同時保留啡色Cerachrom陶瓷錶圈，並加入新款Daytona嘅改變。