捱過咗萬惡既嘅懲人節，係咪應該開枝靚香檳賀一賀佢先! 話說前排 Krug 嘅第6代傳人 Olivier Krug 特登飛嚟香港，就係為咗介紹呢枝無得輸嘅 Krug 2002年vintage，各位手足 Cheers !

一個男人，一年入面要同女士Fine Dining 嘅機會簡直係多不勝數，情人節、聖誕節、生日、紀念日，座底都有 4 次，仲要未計大家心血來潮要食好西嘅日子。所有靚西餐，都需要講配酒 Wine Pairing，而最簡單直接、又配合到最多食物嘅葡萄酒就係香檳 Champagne。

Krug第6代傳人Olivier Krug

今次講呢枝 Krug 2002，一班酒徒行家們等到頸都長埋。Salon 2002 年已經被人歌頌咗幾個世紀，但Krug就到今年先至出，究竟有咩玄機? 根據 Olivier 當日嘅講法，Krug 具年份嘅作品需要表達到該年嘅故事，即2002年嘅氣候、土壤、收成、陳釀等等要素。其實法國香檳區每一年嘅葡萄變化都好大，個性會好唔同，有啲要陳釀得比較耐先可以帶出最佳嘅風味。

Krug 嘅厲害之處，在於佢夠膽出咗03年，之後先出返02。大家都知02年係收成非常好嘅一年，葡萄嘅成熟比較遲，去到9月初天氣轉熱，令到收成更醇厚豐富。

Krug 嘅首席釀酒師Eric Lebel話，佢地唔驚做最遲出2002年嘅香檳品牌，因為香檳的質素比一切重要。

Krug 2002年經歷咗13年嘅光陰，唔單止味道豐盈，而且結構紥實，強度適中。酒香嚟講，有熱帶水果、白色和黃色水果香味，有少少可可豆、蜜糖與同煙燻氣息，飲落去個陣嘅新鮮濃郁就有如一首對水果的讚美詩，所以佢地叫 An Ode to Nature!

同場加映 : Krug Grande Cuvee 158th Edition 同食得落肚嘅龍蝦

呢枝Pinot Noir (40%) + Chardonnay (39%) + Pinot Meunier (21%) 嘅經典混釀，好適合配搭有少少酸度嘅海鮮菜式，又或者同各類水果甜品做 Pairing，都係咁優雅迷人。