成日聽到新聞話有國家越界捕魚，原因係自己過度捕魚，令自國海域乜都無得剩，生態平衡被完全破壞，呢啲人去到其他國家搶魚，又做返同樣嘅事，結果所到之處，魚毛都無條。地球另一邊則有人主張要保育瀕臨危險物種、使澳洲漁業得以持續發展，並保持海洋不受污染，嗰個組織叫澳洲海洋保育協會（AMCS）。

Oris 最近出咗隻善慈限量錶，所得收益將捐贈AMCS，支持澳洲保育工作，買錶之餘，份外有意義。Oris Great Barrier Reef Limited Edition II限量錶，全球限量2000隻，係Oris經典系列Aquis潛水錶系列嘅延伸。

46mm不銹鋼外殼加螺旋式安全錶冠，防水性能去到50 bar (500米)。單向旋轉黑色陶瓷錶圈，經過拋光處理，上面有分鐘刻度，錶盤用返海藍色做主題，黃色令人聯想起海中嘅美麗珊瑚群，好有大堡礁嘅感覺。

Oris 自家自動上鏈機芯Cal. 735，6點鐘一個日期視窗，內環有星期顯示。旋入式不銹鋼底蓋，刻有澳洲地圖、限量編號，可以揀黑色橡膠錶帶或者不銹鋼鍊帶。