話說 Ralph Lauren 都係車迷 (唔係車路士)，全球得4部嘅1938 Bugatti Type 57SC Atlantic Coupes就係佢嘅收藏品之一，RL Automotive 39mm玩咗部車嘅木製儀錶盤同精鋼車輪，收細埋個錶盤size去到39mm，可謂啲反其道而行。不過隻錶最值得留意仍然係佢搭載咗積家幫佢做嘅RL701手動上鏈機芯。

RL Automotive 39 屬於2016新品，腕錶採用噴丸黑色砲銅精鋼錶殼，同上面嘅安波那木樹錶圈形成強烈嘅對比效果，睇得出個Crafting相當之靚，手工切割，以扭索紋呈現出豐富光澤。

黑色啞光電鍍錶盤，有米色Super-LumiNova夜光塗層時間刻度、劍形指針。錶冠同樣係噴丸黑色砲銅精鋼，經過噴砂技術等工序之後，耐用程度更高。積家機械機芯，144個部件，具垂直日內瓦波形飾紋、Perlage 魚鱗飾紋，提供到大約70小時嘅動力儲存。

1938 Bugatti Type 57SC Atlantic Coupes

錶面係弧形藍寶石水晶鏡，錶底為磨砂處理嘅藍寶石水晶，39mm錶盤見到12點位一個RL Logo，6點位有一個小秒盤。黑色短吻鱷魚皮錶帶，好有古董車、英倫風嘅感覺，喺香港，要搵襯到隻錶嘅車相信更困難。