非重口味威士忌嚟講，Glenfiddich 都算係我其中一隻好鐘意嘅牌子，呢隻以Single Malt聞名於世嘅威士忌，當年有段好輝煌嘅歷史故事。講酒之前，先同大家講吓故仔。1887年，有個叫 William Grant嘅男人，佢聯同自己嘅7個仔、兩個女一齊開咗間蒸餾廠，由於嗰度係一處特別多鹿嘅山谷，所以隻威士忌用蓋爾語 (Gaelic) 講就係 Glenfiddich。

左邊就係 William Grant

本身Glenfiddich同蘇格蘭眾多品牌一樣，都係供應原液俾其他廠做Blending，20世紀嘅前半部，Blended Scotch Whisky仍然係市場主流，就好似 Johnnie Walker 就以自己嘅獨門調和技術，混出一手好whisky，自然就大賣。但格蘭 (Grant) 家族去到第4代經營者Sandy Grant Gordon，就反其道而行，推出 Straight Malt 威士忌，仲出口到英國等地出售，開始改變世界對單一純麥嘅睇法。

當時蘇格蘭並非無Single Malt，但數量非常少，可能得幾間廠做，而且無出口到國外，所以後來啲人多數認Glenfiddich做世上Single Malt嘅先驅。出口漸漸增多，國際飲家們對於單一純麥嘅渴求愈來愈大，亦引領其他蘇格蘭酒廠轉型做Single Malt。

經過一段時間，Glenfiddich已經行銷到世界180幾個國家，更加穩佔世界單一純麥嘅龍頭位置。酒廠至今仍然係由家族經營，擁有非常高嘅自主性，並唔會輕易受到財團或市場波動所影響。

Glenfiddich主要作品包括12、15、18、21、25同30年，全部清一色Single Malt，三角形酒樽成為品牌標誌。12年被譽為得獎最多嘅Single Malt，ISC、IWSC獲獎次數太多，呢度唔一一詳述。當你向高年份作品進發，你更加能夠感受到年月帶嚟嘅昇華，層次變化，醇厚香氣、皮革、黑朱古力、檀木形成好美妙嘅複雜性，下次品嚐，不妨俾多少少Respect，高年份唔好加冰。