訪問之先已有聽聞 Max 係一個與別不同嘅鐘錶老細，接觸過後先明白，佢最特別嘅地方係 : 有 Guts。講起 MB&F，佢笑言 : 「你會唔會夠膽整隻嘅錶，玩黃、藍、紅，3隻顏色，加埋啲圓形、正方形、三角形，然後賣幾十萬港紙? 」

錢，唔係咁重要；自豪、快樂先重要

旁人聽完呢句大概會笑出聲，做過積家7年，之後去Harry Winston做Managing Director，開創 Opus 系列，再搞埋MB&F做老闆，典型成功人士背景，Max 係有錢啫，都唔駛離地到咁掛? 其實Max用盡平生積蓄創立 MB&F 之初，已經做足心理準備，可能有日會迎接失敗，「最多都係無哂錢，搵過第二份工啫」，羅馬非一天建成，公司前後都經歷至少4次破產危機，直至近年，佢減少 1/3 零售市場，堅決維持每月產量於23、24 隻腕錶，你試吓其中某啲款式唔受歡迎、無人訂，該年營業額一定不堪設想。

「MB&F 係一個 Life Decision，而唔係一個 Business Decision。於我而言，鐘錶市場就好似一條高速公路，大家都努力地往同一個方向邁進，但MB&F就選擇衝去路邊嘅森林，拎起電鋸，徒步開路。會去邊，我地唔知，遇到咩事我地都唔知，但呢個就係樂趣所在。」 意思即係話，重覆其他人做嘅事，並無樂趣可言。「我承認，呢個係一個非常非常自私嘅決定，就係為咗追尋快樂。」。MF&F 於高級鐘錶市場，僅屬SME規模，Max自己亦只係賺緊 Harry Winston 年代一半人工，佢一再重申，今日的Max係為尋找快樂，享受自己獨有嘅作創作，並非只為賺錢。「如果你為咗賺錢而創業，當你無哂錢，你會覺得好慘，但如果你為鐘意做而做，即使輸錢，你都唔會受到太大打擊。」

順從自己的驕傲，不要順從市場

Max 於事業上，絕對係自我到爆炸嘅男人，佢造靚錶，絕不會重覆他人，「做啲人地做過嘅嘢，有乜意思?」即使 so called 嘅市場有潮流或訴求，佢都要求貫徹始終，忠於自己。「我只得兩隻錶賣得比較差，其中一次，都係唯一一次，我聽咗所謂嘅市場訊息。當年Legacy 1、2之後嘅 Legacy 101，我本身想做 44mm 錶殼，但班零售商同我講，大錶唔得架喎，所有客都係玩39-40mm 架咋。我聽從意見，用咗個細錶殼，定價甚至比 LM 1 平25%，全線零售商都好鐘意，但結果就真係賣得唔算好。」唔理Max 係咪馬後炮Mode，但睇現今市場，佢嘅 Guts 係真係正確。

做開傳媒、編採嘅行家，大概會對呢番說話頗有體會，因為同Max、Alain呢類人傾偈，的確比眾多市場營銷專家有趣得多，因為佢地懂得忠於自己嘅信念，而非聽從客戶，非見風使舵，令我諗起當年Steve Jobs死都唔肯轉大Mon iPhone，佢過身之後Mon Size就立時解禁。

「如果我每次都用『大賣』呢個概念去造錶，肯定唔會做到今日嘅 MB&F，你會唔會夠膽整隻嘅錶，只有黃、藍、紅，3隻顏色，加埋啲圓形、正方形、三角形，然後賣幾十萬港紙? 市場會唔會有客人，夠 Guts 買呢隻錶? 6萬可能有，但賣65萬，啲人係咪咁有吉士? 不過，我地絕對唔會問自己呢啲問題。」

「我地唔在乎市場鐘唔鐘意隻錶，呢個係我地唯一唔會考慮嘅問題，我地只求自己鐘意隻錶，為佢感到驕傲。驕傲、自豪感，係我同我團隊前進嘅最大動力。」貫徹呢個信念，Max 自2013開始已經決定唔再擴張業務，但上年銷售額仍然錄得42%增長，唔理市場形勢，但MB&F嘅錶仍然賣得極好。

設計對我嚟講係一種毒品

Max細個係一個好孤獨嘅小朋友 (佢自己話)，無咩朋友，住喺城郊地區，甚至無單車出城。佢童年嘅快樂泉源，某部份就來自設計，「我好鐘意亂咁畫啲車呀，機械嘢，放心，我細個係開心架。」但佢上到大學，修讀工程就需要理性嘅思考模式，「但我好唔鐘意」，Max 毫不諱言，「好好彩，我24歲第一份面試就去咗積家做 Project Manager，負責發展新產品，而當時，無人想要機械錶。之後去到Harry Winston，成功拯救咗佢嘅鐘錶線，到而家我都覺得係一個奇蹟。」

Max 漸漸擁有好多男士夢寐以求嘅生活，金錢、名譽、權力，應有盡有，「我變成知名人士，上報紙，賺大錢，其實我應該覺得開心。不過15年前，我爸爸過身，當下我並無好難過，但之後一年，我每次上節目、睇電影，見到父子生離死別，我都喊到咩咁。最後我去咗睇心理醫生，人生第一次，經歷為期16個月嘅心靈之旅，期間我發現咗最重要嘅事 : 人生嘅最後一日，你回顧人生，需要感到驕傲。」

Max 檢討自己，事業係成功，但並唔開心，「我決定尋回驕傲，並設計、創造自己嘅作品。」

「好多人問我，點樣可以 keep 住做同一件事咁多年，又或者有無曾經想放棄，但坦白講，設計同創作對我就好似一種毒品咁，你愈做就會需求愈大」，當你對鐘錶嘅野心去到極致，就唯有創立屬於自己嘅世界，毒品我未 take 過，唔理解有幾渴求，但 Max 用行動去證明，造錶，並非為名譽同財庫，只係為過癮，而呢條「癮」正正係引領你去成功嘅路標。

藝術之忠誠。Legacy Machine 1 Silberstein

Max 於上海遇見 Alain Silberstein 提及俾佢重新設計 Legacy 1 嘅事，可惜一直無實行。幾年前 Alain 破產，Max 依舊記得當年嘅對話，再次向 Alain 發出邀請，短短3個月之間，Silberstein 就將設計圖交到MB&F手上。「Performance Art 就好似兩個世界二合為一，又好似一對父母咁，其作品或孩子，擁有父親、母親嘅DNA，但又永遠唔會成父母嘅複製品。」

「獨自創作，有如複製自己一樣，只有自己嘅DNA，而 Legacy 1 Silberstein 就係雙方合作之下嘅孩子，一半來自Alain，一半來自MB&F。很多人唔明白Alain嘅設計風格，以為只係簡單、多彩色，其實佢係運用咗Bauhaus理念，3個形狀 : 正方形、圓形、三角形，足以組成宇宙所有形狀；3種顏色 : 黃、藍、紅，能夠調和世間所有色彩。Alain 遵照傳統，將呢堆元素分開呈現，每一個都獨立成章，所以只有黃、藍、紅、圓、方、三角，唔會溝埋一齊。」

「Alain 忠於自己，去到破產，佢對藝術有一種忠誠，當我創立MB&F，佢已經 100% 唔理市場需求，係我所渴求嘅一種對藝術嘅忠誠。」

Photo : Hung @ h5 Production