威士忌酒評主要分 3 部份，一、酒香，二、口感味道，三、收結餘韻，我認為三者之中，最重要係識得聞香，用個鼻去享受酒中風味，係每個 whisky lover 必修嘅課程。要知道人類嗅覺比味蕾更能分辨味道，Blended Whisky 嘅釀酒師，每年要試成千款威士忌原液，你估佢地真係吓吓放入口飲? 其實都係全靠個鼻架咋！

初學威士忌嗰陣，大家可能會覺得聞香嘅步驟好難做，但我可以話呢個係學習過程，唔係無秘訣去做。呢度先過 5 招俾各位入門酒迷袋住先 :

一、聞香之時，唔好太靠近啲酒

如果有飲開Wine，你會見啲人將個鼻隊到近一近啲酒，但聞威士忌，其實咁做會有反效果！葡萄酒酒精度只係 1X %，但威士忌至少都超過40%，當你靠得太近，好多時都只會聞到酒精味，其他細膩風味都會被掩蓋。所以當每一次聞香，唔好全時間都用個鼻痴實啲酒，好好利用遠、近距離，細心留意酒香變化。

二、酒杯不是氧氣罩

新手常犯另一錯誤 : 長時間keep住聞香動作，甚至將個酒杯當氧氣罩，不停喺杯中呼吸，霧氣此起彼落。其實咁做，又係會減低你對香味嘅辨識度，就好似你聞香水，都係鼻前輕輕 hi 過就聞到，威士忌都一樣，聞香只需靠近酒杯邊，輕輕索吓，等酒香悠然飄散會更理想。

三、遠離異味、集中精神

好多人都忽略外在環境對聞香嘅影響，自己、身邊女伴濃烈嘅香水味，又或者間 Bar、酒店所用嘅香薰、空氣清新劑，都會影響度你嗅覺嘅判斷。搵一個無乜味嘅環境，專注於威士忌嘅 aroma，甚至你可以合埋眼幻想吓，酒液除咗酒精味仲有咩畫面出現，聞香都好講想象力。

四、如果我話杯酒有三小辣味

威士忌好常用嘅 Flavor Chart

好多 Tasting Note 原始版本都係由酒廠，或者外國酒評人所撰寫，佢地平時接觸到嘅食物，甚至physical嘅味蕾結構，同亞洲人比絕對係有分別。如果你未食過橙，人地寫杯酒有橙味，你永遠都唔會理解到，所以不必太在意Tasting Note寫啲乜，用自己食過、接觸過嘅嘢，發揮想象力，甚至寫屬於自己嘅 Tasting Note 絕對無問題，同你背景相近嘅酒友自然能夠理解。

五、加水

做 Whisky Tasting，旁邊一定有杯水，當然你可以飲咗佢，但啲水係俾你加入杯酒度嘅。威士忌於酒窖、木桶之中十幾至幾十年，啲風味隨時間會沉澱於酒液之中，加水可以令威士忌嘅香味揮發得更強烈，尤其係奶油、雲尼拿嗰類香甜。我多數會先試少少 neat，再加幾滴水，試第二次，享受吓個分別，幾十年老酒，或者原桶 Cask Strength 加水後嘅味道會好唔同。不過，水加少少就 ok 架啦，落太多會本末倒置。

以上嘅方法無話 100% Work，畢竟每個人嘅身體結構都唔同，對味道嘅認知都唔同，但試多幾招，從中體會係無壞嘅，久而久之你都會搵到最適合自己嘅聞香之法，能夠寫出自己品鑑出嚟嘅 Tasting Note !