無返咁上下手腕，都戴唔起呢隻Breitling Avenger Hurricane，全黑厚實嘅Oversize 50mm錶殼，表現出純以力量震懾全場嘅驚人氣勢，經典黑、黃色配搭加航空式樣嘅數字刻度，令腕錶更加賞心悅目。唔好以為隻腕會超重，錶殼用咗首創嘅「Breitlight」，將不含錶帶嘅重量下降至68.92克。

50mm 野獸般嘅錶殼，非碳纖亦非橡膠，而係一款比鈦金屬輕3.3倍、比不鏽鋼還要輕5.8倍嘅全新聚合物料，「Breitlight」。將纖維加入聚合物，使Breitlight成為一種極為堅固、極輕、防刮耐損耗嘅強大素材。Breitlight與旋入式錶冠具100米防水性能，上山下海完全唔需要擔心。

搭載自家製B12自動上鏈計時機芯，有天文台認證，70小時動力儲存，使用軍用、航空領域常見嘅24小時顯示。錶盤仍然有經雙面防眩處理嘅弧面藍寶石水晶鏡，具備夜光塗層嘅指針同數字刻度，輕鬆應付夜視飛行嘅需要。計時精準度達 1/4 秒、加上30分鐘、12小時累積計時器，大幅增加腕錶嘅泛用性。

專用錶帶表層係超耐用嘅Military textile fiber，底層優質橡膠，戴上手仍然舒服。約7萬元港幣嘅售價，若果自問有美國際長咁嘅身型，或者好似史泰龍《Expendables》咁嘅軍事氣場，呢隻黑色復仇者颶風一定好啱你。