如果你見到枝威士忌上面寫「Whiskey」而非「Whisky」，咁佢好大機會來自美國，又如果你睇到酒標上面寫「Bourbon」，咁唔駛懷疑，佢一定係美國嘅波本威士忌。

美國對於釀製威士忌都有一系列法例規定，要符合標準先可以叫自己做「Bourbon」。酒桶、原料都係既定之中，值得留意嘅地方係，並非美國Kentucky做嘅威士忌先叫波本，而係美國全部地區都可以做波本酒。

美國對於波本酒嘅規定，其實相對簡單 :

1. 美國境內生產
2. 穀物為原材料，粟米至少要有51% (常見其他穀物配搭有大麥、小麥、黑麥等)
3. 用全新經烘焙嘅白橡木桶
4. 裝瓶出售嗰陣，至少有40% ABV (美帝講酒精度鐘意用Proof，40% = 80 Proof，乘2就得)

基本上法例無話波本威士忌至少要陳釀幾多年，但如果要叫自己做「Straight Bourbon」，就必須至少有兩年aging，並且唔能夠加其他人工色素、或者化學品調味。

美國白橡木桶

Bourbon喺香港嘅市場並唔細，常見波本有Jim Beam、Maker’s Mark、Buffalo Trace、等等，咦? 咁全美最好賣嘅 Jack Daniel’s 又係唔係Bourbon?

你可以見到JD酒標上面寫住「Tennessee whiskey」，意味住兩件事，一、雖然JD附合所有Bourbon法例要求，但佢有權唔用Bourbon個名，二、美國有另一條規定，如果你要用自己個州名做威士忌，你隻威必須完全於當地蒸餾、熟成，，所以JD係由頭到尾 (唔包裝瓶) 嘅Tennessee威士忌。

一般而言，Bourbon都比較香甜、醇厚同順滑，以Maker’s Mark為例，粟米、紅冬麥、大麥，small batch 生產，擁有好甜美嘅拖肥糖、雲尼拿酒香，入口豐盈，絲般幼滑，有橡木、雲尼拿、肉桂氣息，亦係典型香甜Bourbon嘅個性。不過，根據穀物嘅比例、蒸餾方式嘅迴異，Bourbon都可以做出香辛嘅風味。

Bourbon 無論甜定辣都好適合做cocktail，第一大原因係佢唔太貴，貴酒你會直飲，品嚐佢全部細緻嘅味道，雞尾酒需要大量生產，如果用好貴嘅基酒，成本將會好高，威士忌嚟講，Bourbon價格相對較平。第二，味道濃厚，如果你揀一隻好細膩嘅威士忌，或者味道略淡，杯cocktail溝多兩種ingredients就會完全掩蓋佢嘅味道，所以做雞尾酒，最好用風味強烈、顯著嘅酒液，Bourbon就有呢種特質。