香港有個好得意嘅傳統，就係返工、返學時間通常都打唔８號波，一係就放工、夜晚打，一係就假期先打，所以打風其中一個壞處，就係夜晚你出唔到街飲嘢。不過咁，留喺屋企，輕鬆安全地歎酒都不失為一個好嘅選擇。

喺9月開始，大家將會響免稅店度見到呢度皇家禮炮 Royal Salute 32 Year Old Union of the Crowns，32年極致陳釀嘅調和威士忌，嚴選醇化達32年或以上嘅Single Malt / Grain Whisky，以大師級嘅工匠融釀一體，展現出Royal Salute於高年份威士忌嘅強大貴族氣場。

呢隻32年其實係向1603年建立嘅英國君主制度致敬，當年蘇格蘭國王James VI統一三大帝國，成為今日嘅英國，趁住蘇蘭格仍未獨立成功，Royal Salute梗係繼續以呢件咁重大嘅歷史事件做賣點啦。

「皇家之冠」，精挑多家蘇格蘭威士忌廠嘅原液，口感順滑嘅Longmorn、果味豐盈之Glen Keith、甜味怡人之Tormore、濃厚香醇嘅Braeva）以至上世紀開始沉睡嘅釀酒廠Lochside、Caperdonich，風味突出而迴異嘅各款珍貴靚酒，調和成一款散發出濃郁果香，入口帶有軟焦糖、拖肥糖、黑朱古力、香橙味道，並帶些少薑味蛋糕風味嘅極品威士忌。

黑色陶瓷酒瓶，以最純淨之陶土與水燒製，每枝均由熟練工匠，人手耗時10日塑造，瓶身印有獨特嘅手錘純銀紋章，與瓶頂銀冠上粒黑色晶石互相輝映，貴氣十足。憑藉秘色燒製程序，瓶身上面嘅釉光變化多端，每枝都非常獨特。瓶頸飾有玫瑰、乳薊同酢漿草，猶如叙述緊三國統一嘅故事。

9月開始「皇家之冠」於全球免稅店獨家發售，暫時嘅建議零售價為 380 美元，即約3,000港紙左右。