正如山竹牛肉要落喼汁，雞尾酒需要嗰幾滴精華，一定係苦酒Bitters。苦酒，一種葡萄酒或者蒸餾酒混合草本香氣嘅酒精，雖然種類繁多，但都離不開「苦澀」同埋「草本」兩種關鍵風味；Bitters強烈嘅味道，可以為眾多款式嘅雞尾酒加深層次同埋變化，飲落去更加舒服，好多高水平嘅酒吧都有自己調較嘅苦酒，以創造出最特別嘅獨門作品。

黃偉文話俾我地知原來苦澀係美妙嘅，「開始時捱一些苦，栽種絕處的花」、「甜蜜不至太寡」，人生如此，品酒亦應如此，甜酒Syrup飲得太多，味蕾毫不客氣就告訴你「太膩了」，這樣單調的甜味，你還能來個 2^nd Round 嗎? 為咗令客人長飲長有，其關鍵就係Bitters賦予嘅深度。

出名嘅Cocktail Bitters 如Angostura、Collins Orange，芳香豐郁，味道更為濃縮，前者係Rum酒配合龍膽草，苦味唔算太強，後者俾到更多甜香、Citrus風味，當與雞尾酒調和之後，感覺更自然，豐富咗杯酒嘅層次之餘，亦唔會過份影響佢原有嘅風貌，平衡得宜。

另外可用於直飲嘅苦酒，如Campari、Fernet Branca，苦味濃郁，更加有幫助消化嘅作用。市場上，運用Campari嘅雞尾酒recipe非常多，之前MenClub請過美女調酒師Amanda教大家整嘅Negroni，基調就係用咗Campari。而經典Cocktail Toronto就係同時運用咗威士忌、Fernet Branca加埋Angostura，個苦澀味道係幾咁引人入勝。

苦酒著名產地當然係意大利，Campari、Fernet Branca、Cynar、Aperol等等名作都係意國出品，之後就要數到法國、英國、德國等歐洲列強，不過都係嗰句，想要獨特嘅味道，調和出自家Bitters先係王道。

當大家下次去酒吧飲嘢，不妨叫調酒師俾啲Bitters你地試吓。唔駛擔心要飲一shot嘅，通常調酒師都會滴少少喺你手背上面，俾你淺嚐或者聞香。雖然得好少，但相信都足以令你感受Bitters於雞尾酒中嘅強大威力啦！