打唔成風，早在預計之中，住喺香港咁多年，充份了解李氏力場之強大。唯獨今晚希望多啲好天時間，等大家喺中秋夜都能夠欣賞明月。講起月亮，又點可以唔提美妙嘅月相腕錶呢，之前介紹過嘅5隻月相之一，A. Lange & Söhne Saxonia Moon Phase從6月展開一個以月亮為題嘅攝影比賽，9月嚟到亞洲地區，並邀請咗來自香港、上海及新加坡嘅鐘錶界網誌作家、網絡記者一同參與，以光影捕捉中秋最美麗嘅時刻。

1865年，天文攝影先驅Lewis Morris Rutherfurd於美國曼克頓拍攝首張精緻嘅月亮影象；40幾年後，攝影藝術家Edward Steichen發表作品《池畔月色The Pond – Moonlight》，及至2006年以290萬美元成交，堪稱月亮畫意攝影之中嘅經典之作。而今次Saxonia Moon Phase攝影比賽，亦有一幅作品匯聚池畔明月，頗有當年《池畔月色》嘅韻味。

池畔月色 The Pond – Moonlight

Rakotz Brücke & Saxonia Moon Phase

在相片中，攝影師取景於德國Kromlau之杜鵑園Rhododendron Park，並將Saxonia Moon Phase置於19世紀古橋Rakotz Brücke前方。古橋橋身幼長，於河畔上方彎曲成半圓，滿月銀光揮灑之下，橋身與湖面倒影融為一個完美圓形，加上腕錶嘅圓形錶殼、月相顯示，天上嘅皎潔圓月，整個畫面非常和諧優雅。

主角Saxonia Moon Phase配備月相顯示，其7階段傳動裝置，賦予腕錶極高之準確度，月相顯示每隔122.6年先需要校正一日。實心銀月相盤，當中嘅深藍色調以專利塗層製作，並以激光切割出852粒星星。位於18K金雙框、雙視窗內嘅大日曆顯示，同結合月相顯示嘅小秒盤相互映襯。L086.5型自動上鏈機芯可以用單一發條盒提供達72小時嘅動力儲存。