香港嘅酒業市場，看似發達但實際上仍然單一，先唔講葡萄酒，烈酒市場入面除咗威士忌較為主流，其他酒液都係小眾品味，例如外國盛已久嘅Gin酒，喺本地仲係發展階段，會專登去飲Gin、識欣賞靚Gin嘅飲家，講真，真係唔算多。不過Gin酒咁正，假以時日，一定可以瘋行香港。如果大家未係好熟悉Gin，不如試下10月推出嘅京都Dry Gin — 季之美，應該會比較適合港人口味。

Gin酒，一種主要以杜松子Juniper Berry為原料嘅蒸餾烈酒，混和其他穀物、水果、植物香料之後，經常有濃郁嘅草本、木香、香料辛辣，酒精度多數為4X度，初學者的確唔係咁易接受。不過你慢慢開始飲，漸漸就會不能自拔，甚至見到靚Gin，你就有種必需直飲，不能溝酒嘅崇高尊重！只要你識欣賞，Gin酒嗰陣獨特嘅香味絕對不比陳年威士忌遜色。

Kyoto Distillery

講返呢枝京都作品Ki No Bi季之美，貴為日本首家手工氈酒蒸餾廠，好多人都對佢充滿期待，終於酒廠宣佈下月會正式開賣。一般Gin酒用雜穀、甘蔗糖蜜為基調，但季之美則用日本米酒，即Sake做Base，所以特別有日式米香、自然舒服嘅甘甜喺入面。酒廠用咗半年時間精選日本最優質嘅原料，如京都老舖嘅玉露綠茶，仲有柚子、檜木、山椒、檸檬皮等材料，將之分為「柑橘」、「草本花香」、「香辛」等6大風味，各自使用不同嘅蒸餾器進行蒸餾程序，最後再精巧地調和一體。

日本嘅水質大家都知有幾靚，季之美用埋頂級伏見名水，增加酒體嘅柔和度同細膩口感，達至我地成日講嘅日式和諧感覺。酒精度45.7度，700ml裝未連稅定價5,000日元，10月會喺日本Whisk-e、百貨、酒類零售店開售，如果經開日本，買枝嚟歎下Gin酒嘅美妙之處啦。