我必需承認，細個嗰陣飲親啲韓國酒都係綠色細樽裝真露，而隻酒係無乜味，類似水溝酒精溝化學物咁。除咗用嚟劈醉自己 (人地) 之外，同「好飲」兩字沾不上半點關係。而現今香港市場，飲Whisky、Wine、Cocktail、Sake數量最多，韓國酒嘅普及性可能要排喺Vodka、Gin呢類烈酒之後。不過，最近喺灣仔利東街俾我發掘到一間韓國餐廳Bistro Seoul，可以飲到非常靚嘅 Korean Wine！

Bistro Seoul

韓國釀酒方式其實與日本清酒有啲似，都水、米、酵母，而韓國有隻萬能酵母叫Nuruk，以野生穀物同自然黴菌的傳統發酵方式製成。百幾年前釀酒係韓國家傳戶曉嘅技能，就好似整泡菜咁。每家人都會釀製屬於自己嘅酒，不過曾經有段時期行禁酒令，使到呢個技能失傳，而家只有專業釀酒師識做返傳統Korean Wine。

Nuruk

簡單地介紹，飲韓酒要識Takju同Makgeolli；米、水、酵母擺埋一齊陳釀而成，帶有沉澱物，且酒色混濁嘅係Takju，酒精度一般有14 – 19%；而將下面嘅米、沉澱物再加水釀製嘅就係Makgeolli，即係女生們好鐘意飲嘅韓國濃酒，酒精度6 – 8%，帶有香甜嘅風味。

宋智孝代言嘅Makgeolli

Takju擺得耐，沉澱物會慢慢於瓶底積聚，上層變成清澈嘅酒液，嗰啲就係Yakju，味道純正，而帶有清甜果香；用Yakju蒸餾多次，或者幾次，你就會得到強勁嘅韓國燒酒Soju，酒精度高，可以加入不同材料，變成人參酒、五味子酒等等。不過，米呢項食材喺當年，或者現今嘅北韓都係奢侈食材，釀酒時多數會配搭比較易種，比較平嘅材料，而真露就係燒酒加水版本，所以得十幾至20%左右酒精度。

仲有IU代言嘅真露

當日喺Bistro Seoul品嚐到韓國真正風味嘅佳釀，比預料之中味道較濃，可能因為韓國食物都係重口味，所以佐餐酒都作出相應配合。呢度同日本清酒就截然不同啦，因為飲開純米大吟釀嘅朋友都知，愈勁嘅Sake風味愈細膩，係飲Details同埋層次嘅，不過對於韓國人而言，就會好似水咁淡，無辦法，呢啲係民族口味嚟。

當日幾款印象深刻嘅靚酒 :

Chunbihyang 千秘香生酒，Takju，酒精度14%。手工釀製，經過5次發酵程序，每次均會加入新材料，再陳放3個月先至入瓶，為總統府國宴用酒。味道帶甜，口感圓潤，其杏仁、椰子、焦糖等甜味，好啱女仔飲。

Bbalgan Wonsoongyi (Red Monkey)，Takju，酒精度10.8%。2016年推出嘅酒，所以用生肖做標籤。以紅麴米釀造，酒色呈鮮艷紅色，有降低膽固醇嘅功效。味道清新，有帶乳酪般嘅輕微酸度，比較適合搭配泡菜之類嘅辣口食物。

Hwayo 火堯，Soju，酒精度41%。最普遍嘅燒酒之一，本來是陶器起家，2011年開始釀酒；酒色清澈，口感順滑，花香味非常濃郁，但仍然能夠保持輕盈質感。

Moonbaesool，Soju，酒精度40%。發源自平壤嘅酒廠，超過150歷史，至今已傳承至第5代，被列為非物質國家文化遺產，一直是皇室御用靚酒。2000年南北韓領導人金大中和金正日會面時，就係用呢隻牌子嘅作品敬酒。栗子、堅果味較為明顯，且帶有醋香，比較適合海鮮，甜品之類。