IWC呈獻3款工程師系列計時腕錶，走復古Classic風，全因主題係向經典賽車傳奇致敬。縱然外觀為優雅古典風格，腕錶內搭載嘅69370型自製機芯則為品牌全新傑作；創新工藝遇上經典賽車魅力，答案就係呢 3 款新作: “74th Members’ Meeting at Goodwood” 特別版、Rudolf Caracciola特別版，同埋W 125特別版，除咗Goodwood限量74隻之外，另外兩款都係限量750隻。

“74th Members’ Meeting at Goodwood” 特別版 (Ref. IW380703)

以英國南部海岸，富有歷史之賽車盛會為靈感，具42mm純紅金錶殼，配上黑色錶盤，沉穩而簡潔。錶盤上有兩個累加器，加上小秒針、外圍測速刻度，同跑車嘅儀錶板一脈相承，襯埋棕色小牛皮錶帶，更有經典車款內籠嘅質感。

Rudolf Caracciola特別版 (Ref. IW380702)

名字來自1930年代3次奪得歐洲大獎賽冠軍嘅傳奇車手 — Rudolf Caracciola。42mm錶殼採用精鋼質料，配合鍍銠指針、岩灰色錶盤營造出低調、典雅之風韻。整個設計都圍繞佢當年架戰車嘅儀錶盤做樣式，具雙面防反光凸狀藍寶石玻璃錶鏡，同樣襯棕色小牛皮錶帶。

W 125特別版 (Ref. IW380701)

呢個名仲唔係講緊 Mercedes-Benz W 125 Silver Arrows? 回溯至30年代末期，Rudolf Uhlenhaut創製之戰車稱霸賽場，猶如而家Silver Arrows繼續領放頂級賽車運動一樣，其輝煌歷史亦傳頌至今。鈦金屬錶殼、鍍銀錶盤，黑色指針加上嵌入式時標，全部以W 125嘅駕駛艙風格做主導，重鑄經典傳奇車款。

3款特別版都係由IWC 69370型全新自製機芯驅動，具有導柱輪構造嘅計時由超過200個獨立零部件組成，直徑30mm，厚度7.9mm，雙向上鏈之棘爪式上鏈系統，於擺陀轉動1,123圈之後，可以獲得長達46小時嘅動力儲備。平衡擺輪振頻為4赫茲，確保極高精準度。鑲嵌有33顆紅寶石嘅機芯，亦飾以日內瓦條紋、珠形紋飾。