不知不覺，原來超經典嘅朗格系列已經推出足足22年。1994年10月25號，朗格於Dresden王宮舉行重返錶壇後嘅第一個新聞發佈會，展示出包括Lange 1嘅4款新錶，當時引起坊間極大迴響，各大報章之上，都見到設定為25號嘅朗格新錶款。22年後，2016年嘅10月25號，朗格為發表全新18K蜂蜜金色Lange 1 Time Zone 特別版，錶盤上面標誌性嘅大日曆被設定為25號，絕非偶然。

自2005年以來Lange 1 Time Zone成為系列中極具代表性嘅型號，錶盤排列井井有條，本地時、第二時區資訊一目了然。用家只要透過側面嘅按鈕，就可以令到刻有24個地名嘅城市圈順時針轉動，從而調較時區。蜂蜜色特別版則略有改動，城市圈上面嘅歐洲中部時間以Dresden作標示，而非標準款式中嘅柏林。

特別版錶殼以18K蜂蜜色金製成，直徑41.9mm，厚度為11mm，顏色同黃金款確有明顯不同。上一款使用呢隻材質嘅朗格腕錶，已經要數到限量200隻嘅1815 “200th Anniversary F. A. Lange”，朗格於特別錶款先會用Honey Gold，除咗顏色特別之外，另一原因為蜂蜜色金比普通金屬硬度更高，更為堅固。

錶廠自製L031.1型手動上鏈機芯，經雙重組裝，具雙發條盒，振頻可達每小時21,600次，提供到長達3日動力儲存。Lange 1 Time Zone Dresden Honey Gold限量100隻，只會於17間品牌專門店發售，港幣定價為49萬。