【越淡麗】醉人之新潟縣清酒祭

文：MenClub Raphael　　圖：互聯網
POSTED ON 26 Oct 2016

從事酒界一段時間，去得最多就係試酒會，從葡萄酒、威士忌、中國白酒到各類烈酒，林林種種，講真嗰句，每個月都是飲個不停的生活 (傷身)。眾多試酒會、酒聚入面，我最記得嘅，就係一年一度嘅新潟縣清酒祭 (Niigata Sake Festival)。筆者自問對酒量都有啲自信，亦懂得自控，職業生涯唯一一次，令到我呢個「酒仙 (偽)」要「走先」嘅，就係一堆新潟靚酒。

點解新潟縣政府要嚟香港搞清酒祭? 唔知大家有無食過和牛，神戶、佐賀、飛驒等等，出名嘅話全世界都會慕名到訪，俾極高嘅價錢去食幾塊牛肉。其實清酒都一樣，釀酒原料不外乎 : 米、水、酵母；飲家們都會睇地區、睇米種去揀酒，例如靚酒多數都係出自兵庫縣嘅山田錦，如果該地方擁有屬於自己嘅靚米，將會為當地嘅農業、清酒業、旅遊業等多個範疇帶來莫大收益。

新潟縣清酒素來名聞天下，之前佢地就帶來「十年磨一劍」嘅新品種酒造好適米 — 「越淡麗」，而經過一段時間嘅沉澱，呢款新米嘅口碑亦相當唔錯。我同「越淡麗」嘅邂逅就發生於尖沙咀The Mira酒店內舉行嘅新潟縣清酒祭之中。

點解一個專業酒徒都會情不自禁飲到醉? 只此一晚嘅盛會之中，共有超過90間公司、30個酒造、200款頂級清酒俾你品嚐，對一眾Sake酒徒來講簡直係天堂。全新潟縣最頂級嘅酒造聚首一堂，雖然來自同一地區，但每間嘅釀酒方式、哲學皆不盡相同，起初只係諗住淺嚐，但不知不覺就沉迷其中，愈試愈不能自拔，呢種上癮嘅感覺，相信各位清酒迷都體會得到。

今年當然會有 Sake Seminar 啦

今年11月中將會舉行新一屆新潟縣清酒祭，坦白講最初以推廣「越淡麗」為名來到香港，我都估唔到會繼續舉行，所以佢每次舉行，我必珍而重之，把握機會同啲酒造老友見吓面。如果你對新潟縣嘅清酒有興趣，又唔想直飛日本，呢個絕對係必去嘅試酒大會。

日期 : 2016年11月16日 (星期三)
時間 : 1900-2100
地點 : The Mira Hong Kong 18樓宴會廳
票價 : HK$550 (28號前買仲有Early Bird，HK$400)
查詢 : http://www.afoods247.com/sakefestival.html

COMMENT