細個嗰陣曾經好興玩Laser，簡簡單單一支筆，禁個制就會有紅色一點投射出嚟，後來發展到好多顏色同Pattern，價錢又唔算好貴，個個學生都會買枝返學校玩，甚或乎老師們都會用嚟配合PowerPoint教書。勢估唔到Graham新嘅Chronofighter竟然玩返Laser，一見到啲童年回憶就返哂嚟。

新錶個名叫Black Arrow Digicamo「黑箭」，見到佢個標誌性超大Trigger就知係Chronofighter系列嘅成員。腕錶玩戰地迷彩風格，數碼迷彩錶盤、帆布錶帶，極之Tough，將戰場感覺玩得淋漓盡致。最特別嘅係錶款附設一枝綠色1 mW雷射筆 (第2類)，除咗睇時間，男士們仲可以玩返夠本！

將枝雷射筆對準錶盤上面個神秘三角型，就可以投影出一個24小時時區嘅全像式球體投影圖，精細度比想像中更加高！除此之外，雷射筆仲有荒野求生功能，可以喺夜間吸引注意力，顯示自己嘅位置，同時亦可以驅趕野生動物，但如果用Laser同貓科動物玩，真係後果自負。

雷射裝置仲有個重要功能，就係防偽！Graham假錶問題喺市場上面都擾攘咗一段時間，錶廠見到當然唔會坐視不理啦；Black Arrow Digicamo嘅激光控制技術就係不可仿造嘅安全系統，再加上每隻錶嘅小秒盤都有獨特嘅識別碼，大家用非官方途徑買錶的話，就要認住呢兩個防偽特徵啦。

Graham Chronofighter Black Arrow Digicamo，47mm超大黑色PVD精鋼錶殼加陶瓷錶圈，配搭G1747自動計時碼錶機芯，擁有Incablock避震器，提供到48小時嘅動力儲存，官方售價 : HK$61,000。