經過昨日美國大選，好多人都會形容2016係「大奇蹟年」，李斯特城奪得英超冠軍、英國脫歐成功、LBJ反勝勇士，當然仲有Donald Trump擊敗擁有全明星、傳媒支持嘅希拉莉。尋日睇住美國國土逐漸染紅，真係每秒秒都矚目驚心，猶幸喺腕錶嘅世界入面，湛藍仍然不可撼動嘅王道主流！

獨立錶廠ArtyA最近為佢地嘅俄羅斯輪盤系列添上藍血一員，從錶殼、錶盤，以至錶帶都係湛藍一遍，靚到不得了！Russian Roulette最出位嘅地方係其錶盤嘅鏤空設計，形成好似手槍 Chamber 嘅佈局，用家可以隨意旋轉表層嘅錶盤，好似玩俄羅斯輪盤嘅上彈動作咁。唔講咁多，去片最實際 :

不過呢個上咗彈嘅膛室，喺擺動時並不會為腕錶上鏈，用家從鏤空錶盤可以觀察到發條盒、同埋整個動力傳輸嘅部份；Son Of A Gun Russian Roulette Blue Blood搭載一隻瑞士製ARR Skeletonized 手動上鏈機芯，提供到約52小時嘅動力儲存。所以話腕錶嘅俄羅斯輪盤設置，仍屬觀賞、玩味性質居多。

話得係小型獨立錶廠，你都估到佢唔會做到大量生產架啦；ArtyA藍血版俄羅斯輪盤腕錶，限量99隻，定價為CHF 9,900﹐換返做港紙計算約HK$78,000左右，做Collections其實幾值得玩！

PS : 個Logo好似The Avengers