日威享負盛譽，然而市場需求之大，令山崎 (Yamasaki)、竹鶴 (Taketsuru)，甚至響 (Hibiki) 都升價十倍，年份作品除咗難搵之外，其炒價更令人卻步。有見及此，日本各大蒸餾廠紛紛推出無年份作品，等飲家們有更多選擇；市面亦有好多Non-Vintage日本靚威可以俾大家揀，「駒ヶ岳」就係其中之一。

過往「駒ヶ岳」嘅作品，呢幾枝而家已經停產

出產「駒ヶ岳」嘅Mars Distillery經歷過一段19年嘅閉廠時間，直至2011年再重新釀製單一純麥威士忌，及至2013年，佢地憑Malt Maltage 「3+25」 28年嘅特別混釀贏得該年WWA金獎，酒廠重整旗鼓，乘勢再次屹立於國際威士忌舞台，翌年佢地再發佈一隻Revival Vintage 2011，慶祝酒廠嘅重生，不過呢兩枝作品都已經成為歷史，要搵都唔易。

竜胆

時至現在，眾人嘅目光已經集中喺上年12月發佈嘅「竜胆」之上，竜胆為長野縣花，威士忌用咗20年以上嘅老酒原液，調和2012蒸餾廠嘅新酒，所以係一支Non-Vintage無年份嘅單一純麥威士忌，限量8,200枝，「竜胆」擁有柔和而成熟嘅乾果香氣，酒精度達52.5%，入口順滑舒服得嚟頗具衝擊力。

小彼岸櫻

繼「竜胆」之後，Mars Distillery喺日前同時推出兩款新Single Malt : 小彼岸櫻 (Kohiganzakura) 同埋於津貫熟成嘅Tsunuki Aging。小彼岸櫻為長野鮮花主題第2擊，多生長於長野縣嘅高遠城址公園。同樣係使用酒廠20年以上長期熟成嘅古酒，但今次則調和2013蒸餾廠之新酒。古老原酒帶來香辛與香甜之酒香，口感豐盈而具深度，層次豐富，ABV 52%，限量5,725枝。

津貫熟成 (津貫エイジング)

另一款津貫熟成 (津貫エイジング) 係為津貫蒸餾所新落成而推出嘅紀念作，限量2,274枝。酒液於2013喺Mars信州蒸餾所進行蒸餾過程，與津貫石窖陳釀3年之Bourbon Cask威士忌調和，得出嚟係香蕉、奶油、椰子等香甜氣息，但甜味同時伴隨驚人嘅59%酒精度，入口之時，實在有豪快之感，不勝酒力嘅朋友，還是加水稀釋一下為佳。而呢枝作品嘅成功，亦印證津貫蒸餾廠於未來更多嘅可能性！