前陣子除夕夜，同班朋友喺屋企開Party，玩Beer Pong，中間幾乎咩酒都溝過嚟飲，紅、白酒，香檳、Vodka、威士忌，全晚就係不停玩，不停飲到天光。依稀記得返到屋企，攤落張床度已經係朝早8、9點，訓咗一訓之後，本身諗住夜晚再出街食飯，點知嗰陣Hangover嘅感覺真係搞到你乜嘢都唔想食…… 人愈大，玩得愈多，你自然會感覺到身體對於Hangover嘅免疫力同埋復原速度會急劇下降，尤其係過咗30之後就更可怕，最近UK Lifestyle Joe就用科學角度解釋咗呢個現象 :

酒精嘅特性係你吸收咗之後會瞬速遊走你身體嘅各個器官，腸胃、心臟、皮膚，可以話係無孔不入。美國研究指出，隨年紀增長，人類嘅心臟同埋胃部都會縮小，向身體各部位嘅供血能力都會隨之而下降，而酒精停留於體內嘅時間就會更長。所以，當你有返咁上下年紀，Hangover嘅時效正常係會愈嚟愈長，兩、三日未散哂都唔出奇。仲有，相比年輕時期，身體水份比例更少，意味住酒精於人體內將更難被分解。

除此之外，過量飲酒的確仲有好多負面影響；例如飲酒本來係求開心，大家都知酒精會令人更興奮，對外界反應更加熱烈。其實酒精嘅效果比較近似令人腦喺一段時間之內，減低負面嘅判斷同思維模式；但當呢個時段過咗，呢啲感覺又會反彈使到班酒徒更加Down，嚴重者甚至會更加焦慮、Depression嘅程度。專家就提議，如果出現呢啲酒精引發嘅情緒問題，可能要進行一個6個月嘅戒酒療程，Keep Yourself Sober，就係最好嘅辦法。

總括而言，飲酒還是以適量為首要目的，尤其比較成熟嘅男士們，飲多兩杯靚酒好過劈一打九唔搭八嘅Cheap酒啦! 身體係自己嘅，逞到一時之威風，有咩後果都要自己承受架，所以大家記得要小心啲啦!

Source : UK Lifestyle Joe