如果你諗住買錶係用嚟保值、投資，第時再放返出去，咁包裝同出世紙等Documents就非常重要啦。最近一位德國退休老兵將佢喺1960年買嗰隻Rolex GMT Master (Ref. 6542) 拍賣返出去，當年只係值US$120嘅腕錶，今日喺拍賣會之上，竟然值差不多US$75,000，最大嘅原因係佢將所有腕錶相關嘅文件都保存得極好，仲有個錶盒、原裝錶帶、收據都keep埋。

是咁的，呢個老先生喺1960年，德國退役嘅時候，有個軍官叫佢買隻Rolex，而老先生當時，係從來未聽過Rolex呢個牌子，仲要隻錶其實都唔平。當時老兵喺軍隊一個月所得嘅收入大約係US$100，而隻Rolex GMT Master 已經賣緊US$120。我諗俾著大家都未必會買啦，用多於一個月嘅人工，買隻你其實從未聽過嘅牌子喎。不過，呢位老先生真係有買，仲要買多隻 (另一款) 送俾爸爸，感動！(突然彷彿聽到陳奕迅首《單車》)

幾時都話孝感動天，好人係會有好報，老先生本身想賣返隻錶出去，諗住估價都係US$1,500左右，但當喺拍賣會聽到主持人話US$75,000，自己都驚喜萬分。但如果佢冇咁齊嘅文件、出世紙，可能估值只會有大約US$35,000。故事教訓大家兩大道理 : 一，靚錶喺適當時候，用適當價值入手，係的確可以升值做投資；二，保存好你啲文件，你估唔到呢堆紙第時可以值咁多錢。