結論行先，呢個Macallan X Urwerk嘅合作酒壺，只能夠用兩個字形容 : 瘋狂。首先當今世代已經好少見人用酒壺裝威士忌飲，雖然Flask係好便攜，但行過油尖旺，中上環金鐘灣仔，幾步路就有一間餐廳酒吧，方便過7仔，兩大頂級品牌竟然玩返啲咁Classic嘅男士備配，你都咪話佢唔型棍。

Macallan，蘇格蘭頂級威士忌，Urwerk出哂名玩複雜、創新、瘋狂嘅Avant-Garde瑞士獨立鐘錶品牌；兩者世紀合作之下，呢個名為Flask 2嘅酒壺絕對唔簡單。經過兩年嘅研發時間，Flask 2終於見光，酒壺由鈦金屬、鋁、不鏽鋼組成，聽落去已經無堅不摧，而佢內部仲包含咗156個部件，其複雜嘅結構比Urwerk嘅錶款有過之而無不及，瘋狂！

猶如好多飛機有兩邊Fuel Tank一樣，Flask 2入面都內置咗兩個108mltitanium tanks，等你可以入返兩隻唔同嘅威士忌，男人嘅嘢，梗係左擁右抱好過獨孤一味啦，呢個超聰明嘅設計，唔單止可以令飲家一次帶兩隻Whisky出街，酒壺下方仲有個叫cask indicators嘅資訊滾輪，記錄返你入嗰兩隻威士忌係邊一年同用咩木，瘋狂！

猶如好多飛機有襟翼Flaps一樣，呢個充滿軍事風嘅酒壺都有Flaps。大家可以見到酒壺放置於檯上面嗰陣，底部係有兩塊如裙擺打開嘅Flaps幫佢企得穩穩陣陣，品牌首席工程師Cyrano Devanthey形容呢對Flaps就好似火箭嘅Landing Gear，當個酒壺要喺檯面「降落」，用家就可以打開個起落架，型棍到震，真係瘋狂！

呢個集合頂級科技、工藝嘅Flask 2，全球限量500個，大家都應該估到所值不菲啦！Macallan網站公布嘅售價為£2,000，即係大約19,000港紙左右，一個酒壺賣皮幾兩皮嘢，但我呢啲酒徒加錶迷竟然覺得物超所值，夠瘋狂未！如果大家好似我一樣咁癲，記得去 http://urwerkflask.themacallan.com/ 度訂購，香港時間，3月8日，22:00開搶！