「話咗飲靚酒能醫百病架啦」、「無論咩事，只要飲返兩杯，成個人都精神哂」，酒友A、B經常喺席間發表佢地嘅治病心得，講到Whisky好似勁過Antibiotics咁；大家心中明白，酒友A、B並非執業醫生，又無相關專業資格，吹到幾大都唔會有人信。不過對於蘇格蘭人嚟講，又真係有作感冒飲Whisky呢個傳統說法，呢次ABC News就請嚟Vanderbilt University嘅Dr. William Schaffner同大家解構呢個迷思。

醫學上，人類係無一種特定藥物去治療普通感冒嘅，市面上嘅成藥，或者醫生開俾你嘅藥，都係用以舒緩普通感冒症狀，等你可以舒服啲，防止其他併發症，並以自己嘅免疫力復原。喺呢個層面上，飲Whisky又可能真係有啲用處嘅。Dr. Schaffner話酒精可以稍微擴張血管，從而令體內嘅粘膜組織更容易應付感染狀況。飲少少Whisky，的確可以令你感冒中嘅鼻、喉舒服啲。

另外，如果鐘意飲Hot Toddy，一種熱上嘅威士忌雞尾酒，就如同所有嘅熱嘢飲一樣，可以使到你個鼻腔舒服一啲。如果你咁好彩，飲完少少Whisky會覺得眼訓，我真係恭喜你呀，因為醫治感冒最重要嘅嘢，就係充足嘅睡眠與休息。

雖然聽落Whisky好似對醫感冒好有用，但其實飲酒對於身體嘅壞處遠大於好處 (從來都話飲酒唔係一個健康行為)，例如酒精會降低身體嘅免疫力，美國一項研究發現，飲完酒之後人體嘅白血球水平會持續下跌、某種細胞因子數量減少，顯示免疫系統活躍度下降。上邊講過，免疫力係醫治感冒嘅唯一武器，飲完酒無疑會令你復原得更慢。另外酒精係一種利尿劑，喺感冒狀態下飲酒，更容易引致脫水嘅情況出現。

所以簡單地總結，若要身體好，除咗唔好買利物浦之外，都係唔好飲咁多酒啦。休息返兩三日，等身體完全康復，再慢慢飲都唔遲啦。