酒海無涯，要學識飲Wine真係一啲都唔易。除咗一堆年份、產地、氣候、酒莊傳統嘅 Factual 嘢要識，另一個最重要嘅元素，就係自己嘅品鑑功力。強大嘅侍酒師、葡萄酒專家不單能夠喺盲品 (Blind Tasting) 嘅狀態下，試出杯中酒嘅葡萄種類、產地，仲可以喺Range入面揀出正確答案，每次睇到都覺得神乎奇技！其實世上每個專家都係由素人做起，《Tasting Panel》雜誌創辦人之一嘅Paul Gregutt，就同大家分享咗幾個關於品酒嘅心得。

一、多品嚐陌生嘅葡萄酒

Paul講呢個心得嘅時候，強調咗兩個重點 : Regular、Unfamiliar；佢建議大家習慣多啲接觸自己唔熟悉嘅葡萄酒，例如法國波爾多、布艮地嘅傳統舊世界作品，都要習慣去試新世界產區。勇於嘗試未見過嘅酒莊、作品，反而會擴闊到自己嘅眼界，讓味蕾更加熟悉各個酒莊嘅分野，有效建立自己嘅心水Wine List。

二、用Tasting Flight嘅方式試品

葡萄酒品鑑重點在於辨識各種風味，一次過飲多幾款作品，可以令你更容易品嚐到佢地嘅箇中分別。Paul亦都建議飲家們可以set主題，搵幾隻相關作品一齊試，例如同一酒莊不同年份，或者法國波爾多酒莊嘅同一年份，甚至以葡萄種類，Cabernet Sauvignon、Pinot Noir、Shiraz，各款擁有相同混釀嘅作品，Vertical又好，Horizontal又好，總之唔好毫無關係就得。

三、熟習用個鼻去率先品鑑

呢度不忘再次提醒各位型男，酒香佔據整枝Wine嘅風味達70%以上，而人類嗅覺分辨味道係勁過味蕾好多，每次品酒，必然係個鼻行先，而非第一時間擺入口。實力強橫嘅侍酒師可以憑酒香得到許多訊息，唔止Wine，Whisky都係一樣，品牌釀酒大師要用個鼻去判斷酒液嘅味道，要做出一款混釀作品，釀酒師隨時要試過千款原液，下下擺落口，真係酒精中毒都唔掂。

四、集中學識品鑑葡萄酒主要風味

若果大家有睇開Tasting Note，唔難發現酒評人寫嚟寫去都係嗰幾樣嘢。酒香之中嘅花香、果香、草木味、木桶味，入口時候嘅酸度、單寧等等，雖然箇中變化層出不窮，但作為起步，辨識到大約嘅風味已經好足夠，例如啱啱接觸枝酒，你聞到酒香有啲檸檬味、白色花香，入口少少酸，單寧 (澀味) 唔重，有呢啲資訊已經好唔錯。

五、含住酒液再於口中吸氣

齋講的確係有啲難明，想象下你飲完啖酒，但唔好吞，讓葡萄酒停留於味蕾之上，然後你就用口吸氣，好似有枝無形嘅飲管咁，啲酒就會開始喺你口腔滾動。Paul無吹水，好多專業人士都玩呢招，仲要玩得不亦樂乎添 (玩到有聲)；呢下都係為咗增加酒液同空氣接觸，同時令啲酒香Hit個嗅覺受體Hit得應棍啲。但記住唔好玩到滴酒出口，否則又會型到盡頭便是 _ 啦。

六、等待餘韻完全散去先試下一枝

喺Open Wine Tasting尤其見到一個情況，就係好多飲家飲完一枝即刻試一下枝，兄弟們，我都知你地好吹得，但咁快飲下一枝，又點樣享受到枝酒原有嘅Aftertaste呢? 有啲作品Aftertaste非常悠久，中間有多層變化，餘韻亦係枝酒嘅一部份，評分都要睇佢。想認真品鑑，Take Your Time，唔需要急，最緊要完整地細味。

七、當可以的時候，請 Jot Notes

如果場合許可，大家不妨寫低自己嘅品鑑報告，呢個動作除咗令你第時可以重溫、比較，當下仲可以令你更集中於Tasting嘅部份，加深呢次Tasting嘅記憶。即使去到現代，好多資深酒評人仲會拎本簿仔出嚟寫，但科技發達嘅年代，大家都係習慣用電話、iPad、手提電腦做Notes啦，易管理、易修改，仲未計有App、Software幫大家做呢件事。

八、努力先係王道

學飲Wine其實無任何Shortcut，飲得多、練得多、學得多，係多勞多得嘅。Paul都分享自己做Massive Wine Judge嘅時候，一日要品評超過100至150款作品，當然我地呢啲業餘愛好者無佢咁誇張，但試得多、飲得密，認真學習相關知識，再向專家請教，我保證各位巴打嘅品鑑功力一定可以與日俱增。