{ SKIP }
文:MenClub John Chan  
POSTED ON 25 Feb 2017

Photos & Video: Suzuki Production

喺鍾意玩車嘅男人堆,經常流傳一啲所謂「必定要擁有過」嘅汽車清單……

保時捷(Porsche)911呀、法拉利(Ferrari)中置V8系列呀、GTR、Type-R、NSX等等……

數得幾數,開始實際啲、實用啲,加部德國中型豪華房車,寶馬(BMW)5系囉!又或者平治(Mercedes-Benz)E-Class。

朋輩間硬係有一種「唔擁有過邊似樣」、「不登長城非好漢」嘅無形壓力。

哦!冇緊要嘅,畀心機搵錢囉! 

以前,大概係10至15年,從你話加部5系定加部E-Class,已經可以分得出你係兩類人,我唔係想借勢褒獎邊部,踩低邊部。而係呢兩個車系的確有著本質上嘅分別,5系買家雖然自知確實需要部中型或中大型歐洲豪華房車,但仍對駕駛操控有一定堅持,唔係要講到好高層次,「吹」到自己駕駛技術有幾勁,至少要部車揸落唔悶,「比到啲『反應』我」;E-Class呢,揸出嚟個「格」同個「勢」要壓得住場,最緊要嘅係:「畀你知道我呢期揸緊『E仔』!」

你坐定定回想吓,呢兩大德國中型豪華房車車系,十幾年來,其實喺操控同舒適度都向對手嗰方走近……5系自上一代(F10)舒服咗好多,懸掛濾震幼細咗,座椅軟墊變得表層軟熟內層厚挺;E-Class呢,過彎抗傾力好咗,低、中、高階級別(由E 200到E 63 AMG),軚盤回饋力同路感都比昔日豐富咗。 

我去年七月試揸過新一代E-Class E 200 Avantgarde(W213)(詳見:http://menclub.hk/auto/7319),發現平治即使喺E 200呢個「E仔」入門級別,引擎波箱嘅契合度都相當之好,轉用「Sport +」行車模式,成部車嘅操控同懸掛反應都緊湊咗。

所以,我喺篇末結語都話:「曾幾何時,520i同ZF嘅8前速自動波箱,一直係我心目中嘅最佳配搭,但試過E 200呢套9G-TRONIC,我覺得520i喺動力傳動組合呢兩方面,終於遇到強手喇,日後真係有必要同場試試呢兩款車。」 

坦白講,如果你係無定向嘅準買家,當暫且放低價格因素同品牌光環,純粹以貨論貨,我相信你好難作出決定。

寶馬新一代5系房車,代號G30。我敢肯定除咗我,好多人都覺得新5系同上代好似樣,變化唔大。呢個係事實。

你回望由第三代(E34)到第四代(E39)、第五代(E60)到上代(F10),每一代之間嘅轉變都好大,有新意,有驚喜。但5系係唔係未試過「變得少」呢?

又唔係,因為第一代(E12)同第二代(E28)其實都幾相似。

你問我咩立場,我當然企喺主流消費者嗰邊,想每次有新5系,外形都多啲改動同「刺激」,即使進取啲誇啲都冇所謂,因為我信寶馬設計部,點樣離經叛道都好,佢哋有分吋有個譜。

去年底我出席BMW HK舉辦嘅新5系傳媒預覽活動,首次近距離觀察實物,發現新5系嘅車身線條比上代清晰、硬朗,上代略帶累贅嘅感覺明顯地被淡化。雖然5系毫無疑問係歐洲中型,以至中、大型豪華房車,但遠望近望都唔算論盡,喺公路見到佢,仍然可以將佢歸納為「瀟洒型仔」嘅豪華房車。

今次試車,代理提供540i M Sport同530i Sport,前者主供展示M Sport擾流套件,亦因內裝規格與電子設備與日後輸港版本有別,所以未有試駕。 

530i Sport唔係配直6引擎,佢同330i一樣,都係配2公升直四Turbo引擎。530i最大馬力252匹/5200rpm-6200rpm,峰值扭力35.7kgm/1450rpm-4800rpm。0至100km/h加速6.2秒。近年「30i」級別嘅引擎輸出數字,可謂見慣見熟,倘若搬字過紙再講一次,你唔厭,我都悶。

但寶馬喺歐洲傳媒試車發表會上表明,廠方喺「2公升.直四Turbo.8速自動波」組合,花咗好多時間微調,呢點冇吹水。試車當日,我由土瓜灣寶馬總部出發,由漆咸道北經理工、加士居道往西九龍,下午兩點幾,塞到爆。我發現引擎喺極低轉蠕動前行至畀多少少油加速呢部份,出奇地線性,而油門踏板嘅踩踏比例亦幾清晰,我記得去年頭試駕嘅330i,上述區域嘅反應相對地模糊。

上代5系facelift後嘅隔音表現大有進步,嚟到今代,隔音更佳,喺「理工彎位」同公主道天橋(往海隧方向)嘅交匯點有啲道路工程,5系嘅地台、車門、車窗玻璃同車頂嘅隔音都好好,我覺得凌志(Lexus)研究開發部有必要快手買部新5系拆開研究研究,「你哋有好強對手呀!」 

我好滿意引擎嘅整體寧靜程度、運轉暢順程度同怠速時震盪水平(熄咗Stop & Go)。我都知,而家仍然有唔少寶馬支持者,接受唔到530i配直四偈,總覺得「530i點都應該係直六囉!」冇法,世界變,希望你有日克服到呢個心理關口。

今次測試嘅Sport版配M Sport懸掛同19吋胎軨(Goodyear F1 Runflat頭:245/40 R19;尾:275/35 R19)。喺平滑柏油路,例如三號幹線青衣至北大嶼山段,仍然畀到舒適細緻嘅濾震感覺,但喺類似塘尾道、加士居道、迪士尼樂園一帶嘅路段,起伏多、天橋駁口多、渠蓋較多,略嫌有啲彈跳同硬繃。

對揸開跑味房車嘅用家,問題不大,又或者佢哋唔會覺得有問題;但我相信揸慣、坐慣「非M Sport懸掛」嘅寶馬用家,可能嫌530i Sport嘅乘坐感未夠軟糯。

操控方面,以4.9米(4936mm)長嘅房車嚟講,5系極可能係同級車之中動態最平衡嘅一部,入彎出彎都好順滑,我希望將來有機會做幾天至一周嘅長測,深入了解吓新5系嘅四輪轉向系統(寶馬稱為Integral Active Steering),對新5系嘅出入彎動態有幾大幫助。

呢部530i Sport喺Comfort模式快劈S彎嘅車身傾側幅度自然得嚟仲可接受,我鍾意;可能我條腰嘅肉真係多咗啲,覺得前座Sport seat嘅腰承夾得緊咗啲,我好清楚自己喜好同需要,如以日用豪華房車嚟講,標準或基礎級別寶馬嘅座椅最合我口味,最舒服。

大部份英國汽車傳媒都認同一個點:新5系軚盤從置中狀態至輕微扭動軚盤呢部份,回饋力同路感都明顯增多,冇晒以前嘅dead spot,由你扭軚嘅第一刻,路感、路訊、軚盤扭動重量都係好線性咁上升,雖然難以同30年前嘅E28或E34型五系相比,但呢個其他車廠相信唔會咁認真對待嘅「細位」,實在令我好好好好開心,寶馬實實在在證明咗,冇因為電軚年代而hea做,有啲位仲係要企硬,要盡做。

__!呢啲先係車吖嘛!

據了解,新5系嘅電力輔助轉向系統同前懸搖臂都係全新設計,都係嗰句,我哋日後會爭取做新5系嘅長測報告,stay tuned!

G30  5系體積比上代輕微增長,車長增多36mm至4935mm,車身闊度增至6mm至1868mm,車高微增2mm至1466mm,而軸距亦只係增多7mm至2975mm,行李艙增多10公升至530公升。試坐後座,雙腿伸展空間及頭頂空間,其實同上代5系差不多,雖然係咁,但喺我嘅標準同實際需要嚟睇,5系嘅後座絕對稱得上闊落。

新5系比上代輕100kg,以530i為例,只重1540kg,竟然比M2 Coupe輕。另外風阻系數亦低至Cd 0.22,車頭鬼面罩(又稱水箱隔柵)內藏開關遮簾,當電腦感應引擎溫度無需被快速冷卻,遮簾即自動關上,減低行車時氣流衝入引擎艙而造成嘅風阻,又或因強風衝入引擎艙所引致嘅浮升現象。

寶馬頗落力宣傳今代5系嘅智能技術,可惜礙於香港法例,唔係所有設計都啱香港用。好在智慧型安全系統仍在,佢包含行人警示功能、追撞警示、車道偏離警示功能(Lane Departing Warning)、變換車道警示(Lane Changing Warning)功能,敏感度可以電腦發辦調校,亦可由用家自設。

呢期德國中型豪華房車都興起配所謂「大Mon」嘅中控台控制屏幕,新5系配10.25吋Mon,而且可以觸控操作,用手指highlight所需項目,改變設定板面layout。今時今日,touch mon係必備,當然各家車廠有各自設計哲學,唔係「老馮」有㗎啦!我始終鍾意用iDrive旋鈕,step by step,清清楚楚。

新5系支援手勢操控(Gesture Control),向住個Mon「展示」《逃學威龍》式插眼手勢就係撥電話,食指順時針或逆時針打圈可調校音量大小。唔知豎起中指會點,我冇咁做,費事佢嬲豬扮死火拋錨。

手勢操控喺心情靚嗰陣玩吓,係幾得意嘅。

今代5系輸港嘅5系有5個級別,由入門嘅520d到頂級嘅540i xDrive M Sport,價格帶由$569,000到$989,000。開門見山,呢期我係寶馬柴油私家車超級粉,畀我揀,一定係57萬有找嘅520d。今次嘅530i Sport,車價$739,000,的確比我想像中貴咗啲啲啲,唯有借用一句老話贈予十五十六R爆頭嘅準買家:「早買早享受」!

BMW 530i Saloon Sport(G30)規格

售價:$739,000

520d($569,000)、520d Sport($599,000)、530i Luxury($789,000)

540i xDrive M Sport($989,000)

代理:BMW HK www.bmwhk.com

車型:四門五座

體積:(長)4936mm x (闊 )1868mm x (高)1479mm

軸距:2975mm

引擎:1998c.c. 直4汽缸單渦輪增壓,前置引擎

壓縮比:10.2:1

馬力:252匹/5200rpm-6500rpm

扭力:35.7kgm/1450rpm-4800rpm

波箱:8前速扭力轉換器自動波,後輪驅動

懸掛:(前)麥花臣支柱;(後)五連桿

制動:(前)透氣碟;(後 )透氣碟

0至100km/h加速:6.2秒

極速:250km/h

油缸容積:68公升

行李艙容積:530公升

車重:1540kg(德制淨重)、1615kg(歐盟標準淨重)

耗油:5.5-5.9L/100km(巿區及公路混合測計模式)、6.9-7.3L/100km(巿區測計模式)

輪胎:Goodyear F1 245/40 R19(前)275/35 R19(後)

文明啲吖不如?唔想改裝車帶嚟危險,係咪可以唔好一刀切一句唔埋就拖呀?好好規管吓係咪好啲呀?德國執法部門就正在宣傳緊呢個「Tune it! Safe!」活動,即係安全合法地改裝,而且親身示範搵AC Schnitzer改咗部寶馬(B ...
autonews
【睇片】AC Schnitzer改寶馬M2警車 宣傳安全合法改裝
04 Dec 2024
這輛重改Subaru Impreza WRX STI,曾在2004年賽過Production World Rally Championship,之後Ken Block及Travis Pastrana都擁有過。2.5公升Turbocharged四缸引擎化後未有提供規格數據,但一定比原本300hp高啦。用上M ...
autonews
【睇片】85000美元抵唔抵?Ken Block擁有過Subaru WRX STI Rally戰車拍賣
03 Dec 2024