尋日一早起身望下個電話就收到個嚇死人嘅消息：李斯特城炒咗上季幫佢哋贏到首個英超冠軍嘅領隊雲尼亞里。雖然今季簡迪離隊之後「狐狸」就打回原型變返護級球隊，不過其實喺歐聯佢哋成績唔錯，加埋雲尼亞里乃係李斯特城奇蹟奪冠嘅球會英雄，個光環理應可以幫佢保住份工到季尾，加上早排「李城」管理層先話會支持佢，點知轉頭就炒咗。難怪消息一出李斯特城個facebook啲嬲嬲就去到某特首候選人嘅級數。

講到「雲爺爺」被炒原因，或多或少都同成績有關。原來李斯特城自上年12月31日贏咗韋斯咸之後，喺聯賽就已經係1和5負嘅劣績，仲要6場聯賽都冇入過波；上星期足總杯又輸咗畀英甲嘅米禾爾出局；唯一值得「開心」係歐聯成績唔錯，週中十六強作客今季西甲主場惡晒嘅西維爾都只係輸1-2，返到主場只要贏到1-0就可以入八強。不過「雲爺爺」面對最大嘅問題係盛傳佢同隊中球員不和，而事主就係兩個前鋒岡崎慎司同埋烏路亞。另一邊廂摩根同埋候夫兩個中堅已經老化，但成個轉會窗只係打算追米高堅尼一個中堅，最後買唔成又無plan B，難怪會被人指責。

香港球迷可能覺得咁嘅成績，呢支應屆英超冠軍炒領隊係無可厚非。但有時足球唔係只講榮譽，好多李斯特城球迷都炮轟管理層過橋抽板，喺facebook都見到一位支持李斯特城超過50年嘅球迷過話，「球隊咁多年黎都係升降機，即使今季要為40分而努力都係開心，作為球迷非常樂見球隊為留喺英超或者爭取進入英冠前六而全力以赴」。到底支持一支50年都未試過拎冠軍嘅球隊係點嘅心情，的確好難明白。不過比起成績，球隊盡全力戰鬥到最後就更珍貴，老實講，雲尼亞里所俾球迷嘅快樂連用文字形容都太困難，球會用呢種手法請走雲尼亞里，難怪咁多英國狐狸迷話以支持呢隊波為恥。

有好多人話候城同史雲斯炒完人即刻唔同晒，但唔好忘記紐卡素上季一樣搵到賓尼迪斯救亡，但下場係點大家好清楚。況且呢個時間炒領隊都可以話係最差嘅時間，李斯特城係英超極少數堅持打4-4-2嘅球隊，而家得返13輪聯賽，根本無時間再適應其他踢法。而家有傳狐狸想搵文仙尼接手，不過文仙尼最擅長係買球員，轉會窗就完，靠佢料子加而家嘅李斯特城想護級，睇怕準備英冠比較實際。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。