Photos: gazoo.com

成日去泰國旅行嘅巴打，可能都坐過當哋嘅八座/九座/十座 Van仔。 

泰國有啲汽車法例真係幾正，好似呢類車嘅皇牌車種豐田（Toyota）HiAce Commuter，闊落、冷氣又夠凍，成班friend包部車周圍去，車唔算好大部，可以叫司機哥哥揸到想去嘅舖頭門口，你知啦，有時啲舖頭喺正啲巷仔附近，又遇正落雨，呢類車就fit晒，一落車就係目的地。

不過，大家都睇唔少新聞，間中又有呢類Van仔喺當地嘅公路出事，好多時都係因為司機大哥休息唔夠，一個不留神就炒車。講到尾，搵啲有信譽嘅司機，坐車嗰陣可以嘅話，搵其中一個人幫手留意住司機大哥嘅精神狀態，如果佢釣晒魚，搵個地方落車同佢飲罐嘢，食支煙，傾吓計，又或者索性畀佢喺司機位瞌返半粒鐘「急叉」，遲到好過冇到嘛（大前提係你唔可以趕坐飛機）。 

日本豐田汽車生活網站gazoo.com，最近訪問咗一個喺泰國揸載客Van嘅車主畢先生（譯音），佢嘅「戰車」除咗用嚟搵食，仲會喺當地Drag Race落場。

泰國改日本車有一手，N年前已有當地車迷將Supra副直六Twin Turbo引擎放喺水上的士。畢先生話呢部HiAce Communter原裝配備嘅3公升直四1KD-KTV柴油引擎，喺搵食車角度睇係OK嘅，但用嚟鬥車就嫌唔夠power喇，佢決定改用來自當地生產嘅五十鈴（Isuzu）D-MAX Pick-up嘅渦輪增壓器，再加上一系列專門針對柴油引擎嘅高性能升級件，令到佢嘅「戰車」馬力大增。

喂喂！咁即係幾多馬力？內文就冇提到嘞，可能驚樹大招風呱！

不過，佢話喺當地0至400米直路加速賽（Drag Race），就錄得15秒嘅紀錄，雖然唔算係超級快，但都好唔簡單。

外形嘅嘢，佢都係「酌量」啦，鬼面罩電鍍飾件同LED燈唔少得，反而係前後軸都換上四活塞制動卡鉗，停得快啲嘛，仲有四條幾型仔嘅Enkei軨。