姚正菁

89年時阿王同TVB藝人姚正菁撻著，仲話經常寫情信畀對方添！

葉蘊儀

當年嘅葉蘊儀可愛到爆，難怪阿王喺佢未出碟就已經睇中佢，仲為佢寫咗首《童話小公主》添！

袁潔瑩

據聞係因為拍《武林啟示錄－風之刀》而撻著，但最後不了了知。

鍾麗緹

因為拍《希臘之旅》音樂特輯而相識，仲高調去阿王演唱會撐場，但最後又係冇結果。

朱茵

又係拍音樂特輯而相識，但維持半年就玩完——不過今次終於知點解，因為相傳係星爺介入喎。

Amanda S

又係拍MV(即係其實阿王溝女都係得一招啫…)而認識，當年Amanda S得19歲，據聞拍完MV兩人仲直衝女方家中關埋房門唔知做咩，第二日女方仲以性感內衣送阿王出門口。至於點解冇下文，就係因為下面嗰個囉。

藤原紀香

城城咁多個緋聞女友，大家最記得相信都係佢。當年係拍《雷霆戰警》而認識，之後兩人就一直你來我往，糾纏咗好一段日子，但最好睇嘅原因係因為中間仲夾住咗《雷》嘅導演唐季禮。

熊黛林

可能係阿王拍拖最耐嘅女友，甚至有傳兩人準備結婚，依家事後孔明咁睇就係神女有心，襄王無夢。當年仲係唔多人識嘅熊黛林因為「城嫂」之名而火速成為傳媒寵兒，最後敵唔過七年之癢。之但係如果你見到下一位係邊個，你又唔怪得阿王會癢嘅！

苟芸慧

又係因為拍MV同廣告而認識，而且仲同熊黛琳喺時間上有重疊，兩人更加喺阿王演唱會中上演一場爭正印戲碼，你睇一場我就睇兩場，最後城城同Lynn於演唱會中「萬人一握手」，本來以為Lynn終於守得雲開見月明，點知冇耐之後就正式分手。不過苟姑娘都唔算贏，後來佢因為身體問題而發福，城城就果斷斬纜。依家佢又瘦返靚返，唔知城城有冇後悔呢？

葉熙祺

有稱「中國宅男女神」嘅佢外貌的確出色，細城城廿四年亦啱哂口味。據說兩人拍拖半年，城城仲送過鑽戒畀佢，不過後來就因為女方太高調而被飛，女方亦絕跡香港演藝界。

許雅婷 Kabby Hui

可能係無妄之災，因為當年傳媒只係發現城城個Instagram有Follow佢就話佢「網交」嫩模。不過當年嘅18位嫩模中，又真係出咗個真命天子喎。

方媛

亦係當年18位嫩模之一，當時就已經坦承係朋友，直到前年「這樣開車要慢一點」正式坐正，就算被人話整容、國貨，城城依然不離不棄，亦冇因此而高調曝光。或者就係因為咁識做，所以兩年後嘅今日就成為「城嫂」啦。

雖然近年城城被網民戲稱為「國貨城」，但以佢呢份緋聞履歷，我係佢都真係唔Care你哋講啲咩。至於呢份名單仲會唔會繼續有得寫落去啦喎…我哋就放長雙眼睇落去啦！