MINI Cooper S Clubman，賣$448,800，我當堂嚇一跳，然後得啖笑！

用當下主流嘅消費思維去想，買車梗係揀最頂級版本，「option list格仔盡tick，唔夠budget⋯⋯搵銀行或財務公司傾吓囉，總之呢，買MINI至少要買Cooper S啦！就住就住買，不如揸部日本車仔算，千祈咪聽埋啲寫車嘅講：買Cooper就夠，嗰啲死窮鬼，邊有錢買Cooper S吖！MINI ONE同Cooper，冇力㗎！」

消費得起，富可敵國，又睇得起MINI呢個品牌，當然揀頂級版本啦老闆，開心嘅話，收車嗰陣去MINI陳列室派埋大利是，「一皮嘢」一封，好唔好？

其實，New MINI Clubman（R55型）能夠喺2007年再生，最主要係睇中現代人對廣體空間汽車嘅殷切需求，後來，車廂達920公升（最大擴展空間）嘅Clubman，喺視覺上都嫌唔夠大，推出更有SUV味同肌肉感嘅Countryman（R60型）。哈！Countryman又掂喎，你睇香港，賣到通街都係。

空間，確實係一個好實在好有說服力嘅大賣點，所以，第二代Clubman變到咁長咁大部，完全可以預計得到。睇廠方提供嘅空間規格數字，未放平後座椅背，車尾行李間容積為360公升，打通晒之後，車廂最大擴展空間達1260公升，真係幾誇 。

配192匹2公升直四Turbo嘅Cooper S Clubman，車重1465kg（歐盟測計標準），0至100km/h加速為7.1秒，極速228km/h。我思想保守，我只會對三門掀背版嘅Cooper S加速時間有興趣，Clubman起跑有幾快，我話鬼之你，配咗2公升直四Turbo引擎同八速自動波箱又點？咪又係7.1秒，好快咩？唔見得。無論係加速時間數字或實際揸落，都係同樣感覺，唔快！好在，低轉起動力幾好，可以想像得到，full load滿載仍會係扭力充沛。

返回基本點，冷靜諗諗，買Clubman，就係貪佢擺嘢或放兒童安全座椅、BB車方便啲。我覺得，涉及有家庭成員（老婆、年幼兒女）嘅廣體空間汽車，真係冇必要成日心掛掛諗住「0至100km/h加速有幾快」，望望Cooper Clubman張specs sheet，1500c.c.直四Turbo引擎，136匹，扭力有22.2kgm，1250rpm嚟晒，0至100km/h加速9.1秒，賣$356,800，成件事唔可以話係「非買不可」「正到死」，但一定比Cooper S Clubman吸引，合理。

Cooper S Clubman最令人印象深刻嘅係：裝造質素高咗好多，例如啲掣、中控台嘅接口位，門板、座椅皮料嘅剪裁，的確比上代精緻咗。不過，呢啲細微之處，只會畀對汽車裝造好在意嘅車迷，又或者從事汽車評論嘅從業員，先會察覺得到。你叫MINI Sales哥哥姐姐搬字過紙對一般客人咁講，分分鍾對牛彈琴，對方一聲：「哦！」又要捱吃一記悶棍。

Cooper S配8前速自動波箱，呢項肯定係好設計，仲記得1.6公升自然吸氣同超級增壓年代嘅New MINI，配6前速自動波箱，喺起波同一波轉二波時，總係欠缺流暢，心諗：畀多一、兩個波段，波段排得仔細啲，set得聰明啲，效果一定好得多。而家嘅8AT，喺開開停停嘅慢車流同要突然加速爬頭，動力發放得相當流暢，應該話「舒暢」，整體表現同寶馬520i或320i嘅動傳（動力及傳動）組合看齊。

另外，後懸嘅早段緩震表現幼細咗，懸掛韌中有柔，上代Clubman，一定做唔到。

好想快啲試Cooper Clubman！