最近買車真係好著數，尤其是廿零萬到三十萬尾嘅價位，選擇多到呢，而且大部份優質盤，車價都比年初時低咗唔少。我見有啲日本品牌嘅SUV，廿一、廿二萬已有交易。

另一邊嘅歐洲高級掀背車（Premium Hatchback），同樣鬥到你死我活成地血，「廿中」起錶，Audi A3、Volvo V40、BMW 120i，30萬內有找，仲好多嘢送。

再睇睇30萬內有乜好嘢，原來福士（Volkswagen）最新款嘅Tiguan，即係Tiguan 2，都係由29萬起錶。喂！大佬，堂堂德國新車，上一代喺香港又賣到通街都係，認受性咁高，點計都冇理「2字頭」。

諗諗吓愈來愈驚，2017年會唔會係世界末日……

Tiguan 2 330 TSI 4MOTION Trail，個名有啲長，唔多慣，哦！原來係2.0 TSI，330呢個數字同引擎扭力量度單位（牛頓米，Nm）有關。咁剛才提到29萬起錶嘅Tiguan 2呢？係280 TSI版本，配1.4公升TSI引擎嘅。 

你問我對Tiguan車系有冇特殊嘅情感，係冇嘅。

我由車系設立初期，一路都當佢係Golf越野車，事實上，佢就係以當時Golf同樣採用嘅PQ35底盤為基礎。嚟到第二代Tiguan，即是Tiguan 2，Tiguan同Golf好親，兩者都係以名為MQB嘅底盤開發。

老老實實，我覺得喺香港買部城巿用嘅SUV，只係集中三方面去諗就夠。

第一，外形。揸車雖然大部份時間都坐喺司機位，冇可能一路揸一路睇到自己個樣有幾chok，你唔係GoPro Cam嘛。但揀到個心水look好緊要，買樓、揀另一半都係咁講，唔順眼、望落唔舒服，你幾抵幾多功能拎幾多獎送幾多超巿「Q旁」都唔關我事。

第二，慳油。你富可敵國，又要型要威，當然撐你買Mercedes-Benz G 63 AMG，但普羅大眾，2公升以內嘅電油引擎或柴油引擎夠用有凸，如果你有打算去試試Tiguan 2，我建議你由280試起，然後先試330。

第三，車要紮實硬淨，因為香港馬路實在太危險，魂遊太虛嘅人太多嘞，有乜大炒殺埋身，頂到兩拳捱到幾棍係好重要。唔係話一講到車身剛性高，抵禦撞擊力強，就等如曲線叫你揀德國嗰幾個牌子，唔少日本或南韓品牌嘅SUV，喺歐洲新車評審計劃（Euro NCAP）嘅撞擊測試都攞得好高分，上佢哋網站刨文睇片，問多幾個對汽車有深入認識嘅巴打，集思廣益，淨係「圍爐取暖」冇益㗎。

講返Tiguan 2，上車揸幾條街已覺得佢底盤同車體好堅實，如果你覺得呢一兩代Golf都硬淨到似坦克，咁Tiguan 2就係硬上加硬。請你唔好再以閂門時嘅低頻沉實程度，嚟評價一款歐洲車嘅紮實程度，咁諗過時㗎喇。

揸住佢喺山路嘅外傾S彎「左質右質」，又或者快速衝過被大雨沖爛嘅柏油路大窿，好淡定，好穩陣，係幾安心嘅。

但係，我略嫌Tiguan 2嘅懸掛冇上一代（即第一代）咁柔韌，似乎係想用家覺得Tiguan車系變得Man咗惡咗（你知啦！有啲男士覺得硬避震先係好嘢，從來冇諗吓坐你車嗰啲人嘅感受）。

我喺幾年前試揸過前驅版Tiguan，好似係1.4公升Turbo機器，懸掛好舒服，支承力好好，成件事好Match。今次試駕嘅Tiguan 2，配Pirelli Scorpion Verde，尺碼屬235/50 R19，論車胎厚度，OK嘅，而「50」車胎，早段緩震效果亦理應唔錯，但我喺吐露港公路沿線嘅天橋，以合法上限嘅車速駛過駁口位，多次覺得彈跳幾明顯，講真，揸咗一朝，落車時我係有少少唔舒服。

不過，要同大家講明，今次我有唔啱，試車時我帶漏胎氣錶，亦Miss咗油站兩次，冇去量度清楚胎氣，會唔會係因為代理人員打胎氣打得太漲呢？希望日後有機會再試試。

Tiguan 2變大咗，車長增加咗60mm至4486mm，仲算係一部4.5米車，唔算大份，窄位攞軚睇位幾好嘅，揸開近十年嘅歐洲Hatchback，喺室內停車場冇理由控佢唔掂。

軸距喺數字上長咗77mm，講真，唔係話好多，但係打開兩側後門望望後座腳位同門檻，明顯比上代闊落。將個屁股靠喺後座扮上落車試咗四五次，算鬆動。頭頂空間幾好，呢部配有Comfort Package嘅版本，有埋玻璃天幕，我比較實際，唔使咁豪嘅配備。

行李艙空間520公升，將成排後座向車頭拉前啲，空間增至615公升，放平後座椅背，最大可增至1655公升。都係嗰句，四個人嘅屋企，唔一定要買MPV，好似Tiguan 2呢類歐日車廠必造嘅SUV一樣啱用。

Tiguan 2 330 TSI 4MOTION Trail配2公升直四Turbo引擎，最大馬力180匹/3940-6000rpm，峰值扭力32.6kgm/1500-3940rpm，7前速DSG波箱驅動四輪。

嚟到第二代Tiguan，好似又重咗，實際數字，淨重（歐盟量度標準：包括油液連一位75kg嘅駕駛者）1645kg起，加埋老婆或女友，1.7噸重。

呢款車有四個動態駕駛模式，節能、一般、運動同個人化，我覺得喺「一般」狀態吓，其實已算sporty，輕輕踩深同放鬆油門，波箱已自動自覺做嘢，唔需要刻意轉去「運動」。我始終覺得呢類SUV唔應該當係Hot Hatch咁揸。

但係，口味嘅嘢係好個人化，好多巴打或姊妹鍾意認為跳上乜車都應該腳腳攞命，咁先對得住自己。「運動」模式下唔算chok，只係喺進出迴旋處或且放且留嘅路口時，略嫌波箱進取過龍，太主動轉低波，呢啲交畀你嘞，用右腳習慣吓唔難嘅。

Tiguan 2 330 TSI 4MOTION Trail有稱為4MOTION Active Control嘅四驅模式選擇掣，有雪地（Snow）、Offroad（越野）、Offroad Individual（越野個人化）同On Road（一般道路）。唔好意思，試車時冇機會用到越野模式，佢包含咗斜坡緩降控制Hill Decent Control、電子差速鎖、ESP（電子穩定控制）同Hill Start Assist（斜坡起步輔助）。喺香港巿區或高速公路揸車，呢類主動四驅系統嘅作用，就好似旅行箱放定支白花油，袋定實冇衰。你話代理如果間中搞吓Tiguan自駕團，返廣東省玩吓越野就好喇。

Tiguan 2嘅車廂設計唔算特別，都係一貫福士嘅務實風格。較有新意同體貼嘅，我覺得有虛擬式儀錶板同前座椅背嘅小餐枱（新設計，開閂易啲，實淨好多），同埋360度廣角泊車鏡頭，喺窄位或泊海灘錶位，可以攞位攞到盡，而且屏幕解像度高。

Tiguan 2 330 TSI 4MOTION Trail喺幾有「大包圍」嘅味道，乜都有，樣樣都幾體貼，「總之你冇乜位可以挑剔我」。但我相信，香港嘅主流城巿SUV買家，未必真係要買到咁豪咁齊Specs。都係嗰句，試咗29萬起錶嘅Tiguan 2 280 TSI先，記得feel吓懸掛濾震效果夾唔夾自己對乘坐舒適感嘅要求。

唔啱囉喎，再殺落去「廿頭」、「廿中」嘅日韓選擇都未遲。