香港人對於「摔角」呢項運動大都唔太熟悉，甚至唔少人對上一次「睇」摔角嘅機會，就係細個睇《筋肉人》漫畫。所以，相信唔少人應該都唔知道日本摔角界其實有個美女摔角手「赤井沙希」，唔單止成績卓越，更因為似樣而被台灣媒體封為「摔角界林志玲」。可惜嘅係，近日佢就宣佈急流引退，仲為此拍攝「引退寫真」添！

現年36歲嘅「赤井沙希」父親為日本前職員拳擊手赤井英和，而媽媽則係拳館教練，所以佢可以話係「格鬥世家」出身，不過因為父母離異，所以曾經有長達十幾年時間冇見過父親。而身材高達174cm嘅佢，一開始其實係走寫真路線，17歲就已經出道推出個人寫真集，一直到26歲時先投身職業摔角，並憑出色技術以及亮麗外表火速成為Fans寵兒，並多次獲得冠軍寶座。「寫真出身高挑靚女摔角手」嘅定位亦為佢帶來劇集、電影、綜藝節目嘅演出機會，甚至曾於《人中之龍6 生命詩篇》成為陪酒孃之一，可見其人氣之高。

不過今年較早前，「赤井沙希」就宣佈從摔角中引退。於引退宣言中佢表示，其實自己早就打算於十週年時引退，希望成為Fans眼中「美麗落下的花」而非「枯萎凋零的花」。另外，當有傳媒問佢引退係咪打算結婚生仔時，「赤井沙希」亦直面回擊道：「如果我係男人你會唔會咁問？」並表示拒絕性別定型，可見佢相當有思想。

而為咗紀念引退，佢亦於8月推出紀念寫真集，從中可見雖然佢已經三十有六，但當年就係寫真女星嘅佢加上長年運動，體態依然維持高水平。唔知佢未來仲會唔會有其他寫真作品見街呢？

IG：saki__akai