近年韓流大盛，唔少韓國偶像組合或者藝人都由韓國紅出國際，甚至唔少日本人都選擇去韓國發展，然後先紅到返日本。而最新加入呢個行列嘅，就有日本美女主播「谷あさこ」。有趣嘅係，身為主播嘅佢唔係靠主持、亦唔係因為加入女團而進軍韓國，反而係靠唱韓國演歌（Trot）。

其實我哋喺2020年亦曾經介紹過「谷あさこ」。現年30歲嘅佢，早於大學時期就已經想成為新聞主播，雖然畢業後以「谷 亜沙子」之名參加電視台嘅主播試鏡失敗，但佢輾轉之下反而做咗藝人成功出道，然後就有機會於情報番組中擔任主持人，算係曲線完成夢想。2017年佢首次為《週刊Playboy》拍攝寫真後，更憑清麗外表以及頗有睇頭嘅身材吸引大量人氣。

而佢嘅最新發展，就係去年年尾遠赴韓國，參加大型歌唱選秀比賽《Miss Trot》第三季。所謂「Trot」其實則係韓國演歌，與日本演歌有所類似但並非一樣，係韓國傳統音樂嘅一種；而《Miss Trot》就係韓國演歌選秀節目。換言之，「谷あさこ」係以一個日本人嘅身份，去韓國參加韓國傳統歌曲嘅比賽。事後雖然72名止步，但就足夠佢於韓國打出名堂，目前仲係日本韓國兩邊走添。

IG：asyakodayo