話就話日本女團嘅整體人氣大不如前，甚至日本少女都唔再以加入日本女團為目標，搞到整個女團界好似人才凋零咁。但正所謂瘦死嘅駱駝比馬大，其實目前日本女團中依然有唔少美女值得大家留意，好似今晚要介紹呢位「五百城茉央」就係其中之一啦！

現年20歲嘅「五百城茉央」出生於日本神戶市。2021年時佢因為哥哥嘅推薦而去參加日本女團乃木坂46嘅五期生徵選，並於翌年2月被公佈為正式成員之一。自此之後「五百城茉央」嘅隊內人氣就一直攀升，2023年3月先係進入單曲選拔，半年後做埋「福神」（隊內人氣最高嘅7位成員）之一，去年4月再做埋Center，成為團體嘅門面。

人氣夠高自然就可以出寫實集。於是今年1月佢就推出首本個人寫真集《未来の作り方》，結果推出首週就賣出超過7萬本，成為Oricon嘅週間銷量冠軍，短短兩個禮拜後更已經宣佈要再版加印，可見佢人氣有幾咁勁。

至於點解標題話佢係「激罕」成員呢？一來當然係佢目前嘅人氣如日中天，二來放眼全日本，佢都係一個非常罕有嘅存在。事關「五百城」呢個姓氏於日本極度罕見，據報成個日本目前只有50人左右擁有同一姓氏，相信基本上係一家人黎。你話係咪因為佢個姓好罕見所以大家鍾意佢？相信應該唔關事；但如果你本身就已經鍾意佢，又見到佢有個咁特別嘅姓，相信你又會鍾意佢多幾分啦！

IG：mao.ioki.official