呢個世界有啲人，天生就有種上等人家嘅氣質。好似今晚要介紹呢位「新田さちか」咁，睇圖你就已經Feel到佢嗰種大小姐氣場。但如果你了解過佢嘅背景，你就會發現……佢真係好可能係個大小姐黎！名校出身、選美亞軍，近排仲開埋公司自己做老闆娘，真係睇相都覺得自己相形見絀呀！

現年27歲嘅「新田さちか」有個好喜慶嘅本名「祥賀」。出生於石川縣金沢市嘅佢，中學係讀日本運動名校「星稜高校」，係日本國腳本田圭佑、知名棒球選手松井秀喜嘅師妹。閒時興趣係充滿貴氣嘅「學英文、騎馬、書法」。中學畢業後佢因為想入讀名校早稻田大學而自修一年，最後雖然唔成功，但仍然可以入讀另一名校青山學院嘅法學部。大學二年級開始玩社交媒體後，更吸引到女性時尚雜誌《CanCam》搵佢做讀者模特兒；翌年又於「Miss青山」選美比賽中獲得亞軍，隨即就出演戀愛綜藝及電視劇，更獲知名經理人公司Horipro收羅旗下。整個人生睇落非常順風順水。

出道後嘅佢發展亦相當唔錯，除咗同同公司嘅前輩「深田恭子」、「足立梨花」、「佐野ひなこ」等一同出演廣告之外，又有大量劇集、電影演出機會。2021年時更於《週刊Playboy》獻出寫真處女作。不過或者係受到同樣係企業家嘅媽媽啟發，所以佢於是2023年時佢宣佈離開公司單飛，開設自家經理人公司之餘，仲搞埋服裝品牌自己做老闆，矢志要於30歲前成為專業人士。

人又靚、家底又好、事業成功之餘仲好上進，難怪日本媒體都話佢有「上品」氣質啦！

IG：chacch1