朋友聚會，慣性去Café食個Set飲杯嘢吹吓水玩吓Game，女孩子可能覺得有得傾餐飽，同啲食唔飽嘅Cake影吓相就好滿足。不過，對男人而言，Café食唔飽，Game又低B，一定勁冇癮拍枱走人。有冇Café係男生女生都唔會悶呢？

小編覺得，大男人就算到咗三十歲、四十歲、五十歲，一樣喜歡玩玩具。有Café放滿老闆多年珍藏嘅黃金戰士、鐵甲萬能俠、小露寶、五星戰隊、六神合體等等超合金玩具，仲有不同遊戲機任玩，男人一定唔會嗌悶。

位於銅鑼灣嘅「薯仔屋」Café，開業近10年，已搞過3200個Party，過百影視名人都「曾到此一遊」，會員更有13000多，算幾受歡迎。我諗，就係靠食得飽，同多嘢玩。

老闆Vincent係典型百分百Kidult，佢話屋企以前有足球機、各樣遊戲機、火車模型等等玩意，最冧死女同學嘅係，佢竟然入得廚房，所以每逢假日，朋友都話要上佢屋企開P，仲成日「爆場」，開開吓，朋友都叫Vincent開間多嘢玩嘅Café。

「薯仔屋」嘅Slogan「Your Second Home」。Vincent話想客人嚟到好似番到屋企咁輕鬆Relax。講咗咁耐，「薯仔屋」有乜玩先？呢度除咗有男孩子喜歡嘅懷舊玩具畀你舞，仲有女孩子喜歡嘅各式娃娃；又有巨型投射螢幕，可以畀你睇碟、唱K、打機；另有英式足球機，可以畀你同friend對戰；想玩飛鏢？唔一定要去酒吧嘅，呢度有正規飛鏢機唔使入錢任掟；唔鍾意玩仲可以坐埋一邊睇漫畫睇雜誌都得。不過小編最欣賞就係有多款遊戲機任玩，Wii、《Winning》系列⋯⋯講真，有機打嘅Café真係唔多，呢樣安排係幾周到同窩心。

食物方面點先？Vincent話「薯仔屋」開業咁多年，知道好多男士當一大班friend聚埋，玩得勁癲嗰陣，食量就即時大增，乜鬼diet plan都忘記晒。所以設計食物份量時，預咗要大碟啲，仲好有信心話「飽到你上心口」（小編係細食女仔，所以特別叫老闆準備試食菜式時輕手啲，食物唔好浪費嘛！）

加拿大肉醬舖天薯條

舖天薯條Idea來自加拿大小食，2006年時香港未興食淋滿醬汁嘅薯條，人人都食M記薯條，所以舖天薯條呢款小食就成為「薯仔屋」招牌菜式之一。薯條淋滿自家製Gravy汁，用豬肉同豬骨熬製多個小時，肉味香濃；莫蘇里拉（Mozzarella）芝士味夠重，溶得快但唔易燶，咬落會拉開芝士絲，非常煙韌惹味；薯條經過特別烹調，先用慢火炸，鎖緊水份，再加熱，令薯條有獨特的內脆外軟口感，仲非常Juicy。

醬燒豬肋骨

薯仔屋招牌菜之一係醬燒豬肋骨，先後贏過本地3個美食比賽大獎，包括︰第6屆「明火食神爭霸戰」的「豬組金獎」、「最具創意獎」及「食家美食推介大獎」，有戰績又有「戰功」，要試！

豬肋骨外脆內軟，濃郁嘅蜜糖醬汁完全滲入肉裡，肉質嫩口易撕咬，連骨頭都滲有醬汁香味，難得的是，肉同骨頭只要輕輕一切便可完全分離，肉質鬆化之中仍有嫩滑薄層脂肪，一啲都唔黐牙。

西班牙茄汁磨菇煙肉意粉

醬汁用上新鮮蕃茄磨製，蕃茄味濃郁，由於以蕃茄汁作為意粉底，所以意粉略帶甜味，不會太咸，夏天食，好開胃，另外，幼質意粉彈牙，配以清新蕃茄汁，絲不油膩。

至尊薄脆薄餅

美式薄餅，出名多料，連薄餅邊都舖滿材料，每啖都唔會Dry。芝士、青椒、磨菇、煙肉、辣肉腸等材料，配搭起來口味清新，同事食咗三件都話唔覺Heavy；薄薄的餅底口感香脆，感覺輕盈。

夏日黃昏(士多啤梨+菠蘿+香橙)/冬之夕陽(蜜桃+香橙+菠蘿)

薯仔屋所有果汁全部鮮榨，賣點之一，大杯，：）。

地址：銅鑼灣新會道4號4樓

電話︰2890 4884

營業時間︰星期一至日: 12:00-23:00

價錢︰$101-$200

網址︰http://www.smallpotato.com.hk/