唔係話要吹奏Netflix，但Netflix時不時加入新奇影片，我唔講近期譚玉瑛姐姐宣傳套《Stranger Things》Season 2，俾我發現咗套紀錄片《Todo Sobre El Asado》（中譯：阿根廷的烤肉盛宴），怪得嚟好好笑。

「喺建築工地，美國人會坐低食三文治，喺阿根廷，我地會喺塊空地燒柴燒肉」你就知道燒肉對阿根廷人到底有幾重要。

導演Gastón Duprat同Mariano Cohn，用咗一個好奇怪嘅角度拍攝紀錄片，不論取材、鏡頭調度、訪問問題、拍攝手法都相當怪雞，跳脫地將「阿根廷的烤肉」呢個主題演譯得相當有趣，由最初教你點屠宰牛隻、阿根廷有烤肉大學、燒肉要擇咩部位等等，最痴線係，佢竟然問一個烤肉大師一條問題：「你有無嘢想同素食者講？」，然後大師個樣西到一個點。

不過最搞笑都係一段講「匙羹切肉」嘅故仔，話說阿根廷布宜諾斯艾利斯有間好受歡迎嘅扒房LA BRIGADA，連球星美斯都係座上客，餐廳老闆介紹咗佢地嘅招牌菜，Bife de Chorizo 即係我地平日食嘅Sirloin 或New York Strip，不過佢地將塊肉上枱serve客時，就會表演用叉同匙羹cut，証明塊肉又嫩又腍，不過原因係點？自己睇套片啦。