較早前因變成唔再係人人都可以食而被米芝蓮取消三星資格，由人稱「壽司之神」小野二郎主理嘅數寄屋橋次郎，大家未來想食可能變得更加困難。不過，另一旗鼓相當由殿堂級壽司大師荒木水都弘師傅主理嘅Omakase食店「The Araki」，則即將於今年12月19日(明天)於尖沙咀「1881公館」正式開店。

今次「The Araki」於香港開店，令人驚喜嘅係主理人荒木水都弘師傅將會親自打理，大家將可以親口品嚐其令人一試難忘嘅壽司料理。

作為神級料理人，荒木師傅有別於其他壽司師傅早早出道，佢25歲先立志向壽司之路出發，並一直勤力學習，憑住一腔熱血，再加上獲得壽司天皇Kiyota Sushi第二代掌舵人新津武昭師傅及主理Izumi的壽司大師Eiji Sato的指導，從佢地身上盡得真傳，最終成為如今壽司界嘅頂級大師。

而就喺荒木師傅44歲嘅時候，其位於東京嘅「The Araki」成功獲得米芝蓮三星殊榮，但其後女兒要在英國讀書，所以決定結束日本店，並移居英國。2014年，荒木師傅於倫敦梅菲爾區再度開設餐廳，並於2018年再度獲得米芝蓮三星肯定，令佢成為史上第一名於東京、倫敦都拎過米芝蓮三星嘅日本大廚。

對於食材嘅要求，荒木師傅可以話係極盡嚴格，但同時佢與世界各地大多數壽司師傅均著重標榜日本直送食材不同，荒木師傅卻認為，無論佢身在世界邊一個地方，使用當地食材嘅做法更具可持續性及更環保：「我希望可以結束必須使用日本食材才能製作出最佳壽司的這個觀念。海洋是環環相扣，連接在一起，唯一不同的是漁民如何捕撈海產，並將其帶回岸上的處理手法。」

而自抵達香港以來，荒木師傅一直同本地漁民緊密合作及溝通，向佢地傳授從鄰近香港嘅國際水域捕捉及保存不同類型海鮮嘅最佳做法，以確保其質量及味道。當佢地成功建立關係後，荒木師傅每日早晨都會同整個團隊親自拜訪漁民，從佢地日常嘅魚獲中精選最佳食材，希望將最好嘅用料製作最好嘅料理，為食客們奉上。

如今已經成功征服東京及倫敦嘅荒木師傅，將會於香港呢個彈丸之地再次接受挑戰，究竟佢可唔可以第三次創造高峰，令香港一眾食客滿足離去呢？

The Araki

營業時間：星期一至星期六

電話：3988-0000

預訂電郵：[email protected]

地址：香港九龍尖沙咀廣東道2A號1881公館前馬廄地下