如果你係想避免幫襯某一兩個大集團，有時出街想食粵菜或者想飲茶都真係可能揀無可揀。不過本來做開日本菜嘅Lubuds集團，近年就積極拓展不同菜色嘅餐廳，最新就有即將於又一城開幕嘅粵菜食府「望月樓」，為大家提供新嘅選擇。

望月樓主打手工粵菜，咁手工嘢就當然要有老師傅坐陣。望月樓嘅行政主廚由曾於福臨門及駿景軒任職，有三十年粵菜經驗嘅李志光師傅擔任，而點心方面，就交由來自澳門永利酒店「永利宮」、有四十年點心經驗嘅陳世輝師傅負責，兩位老師傅加埋七十年經驗，絕對非同小可。

其中李志光師傅為望月樓帶來多道手工菜，包括廣東四大名菜之一「江南百花雞」及「荔蓉香酥鴿」、「回味焗魚腸」等。「江南百花雞」製法複雜而且需時，首先要將整隻雞完整起皮，再將蝦膠釀入雞皮之內，然後上皮、風乾再用滾油淋到熟為止，當中起雞皮、打蝦膠及油溫都需要把握得非常準確，先能夠做出雞皮脆薄又包住蝦膠嘅理想效果。

「江南百花雞」(HK$1,188)

「荔蓉香酥鴿」(HK$168)

「回味焗魚腸」(HK$188)

「薑蔥肉蟹煎腸粉煲」(每兩$50)

另一邊廂，陳世輝師傅貢獻出一系列賣相矜貴、味道特別嘅點心。例如陳師傅獨創、蟹鉗肉、蝦肉、筍和蟹籽釀入水晶皮嘅「海皇百花蟹鉗餃」；步驟比起一般蘿蔔糕都仲要繁複嘅正宗潮式「灌漿蘿蔔糕」，以及「香煎黃金小米糕」、「香煎筍粿」等。

「海皇百花蟹鉗餃」(HK$58)

「灌漿蘿蔔糕」(HK$58)

「香煎黃金小米糕」(HK$48)

「香煎筍粿」(HK$48)

望月樓

地址:九龍塘達之路80號又一城G25號舖

電話: 23378213