{ SKIP }
文:MenClub 魏文青  
POSTED ON 16 Nov 2021

一個新研究發現,美國嘅4至7歲小童其實唔太識得分食物嘅來源係動物定植物,而且有大部份小童認為牛、豬、雞都係「唔食得嘅動物」。有指未來或能從小童著手,「教導」佢哋以「植物性飲食 (Plant-Based Diet)」為主,從而降低碳排放。

以前講環保,就係叫大家慳水慳電、唔好浪費食物;依家講環保,就叫大家要「降低碳足跡 (Carbon Footprint)」,例如件食物由原料到製作以至運送所產生嘅碳排放有幾多,從而斷定佢夠唔夠環保。而長久而黎,畜牧業都被批評產生大量碳排放,所以近年就推廣「植物性飲食」,簡單啲黎講,就即係叫大家以植物為主食,減少食肉,從而減少畜牧產生嘅碳排放。

而跟據最新發表於《Journal of Environmental Psychology》嘅研究,發現4至7歲嘅美國小朋友其實唔識分日常食物來源係植物定動物,甚至根本認唔出食物本身係咩樣。例如研究就發現有26.7%小朋友認唔出杏仁,14.8%認唔出煙肉、32.4%認唔出漢堡扒。

而當被要求分辦食物來自植物或動物時,小朋友嘅正確率都頗差。例如有44.32%小朋友認為芝士係來自植物,認為煙肉、熱狗腸、炸雞塊、漢堡扒來自植物嘅亦有30%以上,另外亦有35%認為爆谷來自動物、認為胡蘿蔔及蘋果係來自動物嘅亦分別有17及16%。

圖片:Impossible Food

但真正細思極恐嘅,係研究中一個名為「可食用測試」嘅部份,該部份要求小朋友將牛、豬、雞、魚,以及草、橙、猴子、狗、毛蟲、沙等一系列圖片分成「可食用」及「不可食用」。結果發現有超過7成小朋友將牛、豬列為「不可食用」,將雞列為不可食用嘅亦有65%。反觀啲真係唔食得 (或者唔常會拎黎食啦下)嘅嘢,答錯率就低得多,例如只有6%小朋友認為草可以食、不足3%小朋友認為狗可以食。

正正就係因為發現小朋友唔識分食物來源係動物定植物,又會將一啲常食嘅動物列為「不能食用」,所以研究就指「兒童係天真的肉食者」,比起「已經擁有大量食肉理由嘅成年人」更容許接受植物性飲食。並呼籲父母唔好「隱瞞及扭曲食物來源」,令小朋友養成「保護動物」嘅習慣,從而更接受植物性飲食。

但值得一提嘅係,喺「能否食用」嘅環節中,研究團隊係用整隻牛、整隻豬、整隻狗嘅圖片去畀小朋友分辨,再睇埋小朋友連啲食物來源係動物定植物都未分得清,小朋友有可能唔知道牛同豬就係「牛肉」、「豬肉」嘅來源,而將其視作與狗一樣嘅「寵物」,繼而將其列為「不可食用」。唔知各位家長又會唔會鼓勵小朋友選擇「植物性飲食」。

資料來源:Children are unsuspecting meat eaters: An opportunity to address climate change

自從疫情開始之後,唔少人都或自願或被逼留在家中,外賣APP就成為唔想煮飯嘅人最方便嘅選擇。但外賣APP嘅「三國相爭」令經營變得非常困難,而Uber Eats就於今日宣佈,會於今年12月31日晚上11點59分終止服務,成為第 ...
gourmet
【外賣】Uber Eats宣佈年尾終止服務 Uber不受影響
30 Nov 2021
無論係因為香港人鍾意去Cafe打卡,又或者越黎越多人對咖啡有需求又有要求,反正近年香港的確係多咗好多咖啡店。而於天后及中環都有分店嘅Preface 近日就進駐銅鑼灣霎東街,開設四層樓高,唔單止有咖啡有嘢食,而有酒 ...
gourmet
【Cafe】唔止打卡仲可以打Code Preface Coffee & Wine銅鑼灣旗艦店
08 Nov 2021