近日外國傳媒爆出，以「Salt Bae」之名走紅嘅土耳其籍廚師Nusret Gökçe，近年身陷多宗與前員工之間嘅官司，當中嘅罪名包括佢「剋扣貼士」、性別歧視、於餐廳內不公對待員工等。令佢原本就唔太好嘅名聲進一步受挫。

圖片：@nusr_et 

據《Insider》報導，Salt Bae目前於全球經營緊22間餐廳，而近幾年間前後有多名來自世界各地嘅員工對佢進行多宗控告。其中包括五名紐約餐廳前員工於2021年8月控告Salt Bae嘅「侵略性管理方式」，指佢會不停辱罵員工；另外四名前員工就於2019年10月控告佢剋扣貼士 (在歐美不少國家，貼士係作員工薪酬計算)，案件最後以23萬美金和解；同樣係2019年另外一名紐約餐廳侍應亦控告Salt Bae於分配貼士前自己扣走3%，案件於2020年7月以30萬美金和解。

另外Salt Bae亦曾陷入多宗性別歧視相關嘅訴訟。其中紐約餐廳嘅Bartender Elizabeth Cruz於2021年控告餐廳於佢第一日返工就要求佢穿上「短裙、高踭鞋、低胸衫」，結果引來男性同事嘅騷擾，當佢提出反對之時，不單止被餐廳拒絕，更於幾日後被解雇。《Insider》指Salt Bae嘅餐廳都有一種極為嚴重嘅「雄性文化」，對女同事相當唔友善。

但你又唔好以為佢對男員工就好好喎。兩名來自英國餐廳嘅Bartender就分別形容Salt Bae嘅餐廳係「金玉其外、糞便其中 (Shit from inside)」以及「有如《The Hunger Game》一樣隨時都可能被淘汰」；另一名來自希臘餐廳嘅Bartender就形容Salt Bae為「獨裁者」，一名前餐廳經理就指Salt Bae嘅世界只有「Instagram同名利」並將自己視為「神」。

而Salt Bae本人及其餐廳嘅律師Christy Reuter回應《Insider》查詢時，就堅稱所有前員工嘅指控都係「針對出名餐廳及廚師嘅無稽指控」。

Salt Bae早於2017年就因為其誇張嘅灑鹽方法而於IG上走紅，不過佢近來最令有記憶嘅，就係世界杯決賽後擅自走入場中與阿根廷球員一同慶祝，期間仲舉起並親吻獎杯。另外，當晚佢亦被拍到試圖拉住美斯，不過就被美斯無視。

資料來源：Insider