八十後或九十後去街，食嘢會唔會揀去飲茶?
唔多會囉，咁係唔係啲點心唔好食?又唔一定，話晒點心已經係香港人飲食文化嘅核心之一，除非你覺得自己鬼仔性格，否則冇乜理由唔like蝦餃燒賣。
講到尾，年青人可能覺得傳統酒樓唔夠型，老餅。再加上放假仲要晨咁早同班師奶逼等位，好啦，有位嘞，隔嚟阿伯講嘢鬼咁大聲，右邊個細路又喊到拆天，所謂一日之計在於晨，你個「晨」咪咁畀人糟蹋咗囉。想避開人潮遲啲食點心唔係唔得，不過預咗啲點心已經擺到凍晒，唔好食囉……

Come on！其實想坐低好好嘆個點心唔係真係咁難嘅，你下午三點幾行過尖沙咀最旺嘅加連威老道一帶，Book都唔使Book，想坐低飲茶就飲茶，食燒賣就食燒賣，一啲都冇難道，最難得嘅係，間鋪設計夠晒潮，舒舒服服，坐咗都唔願走。講緊嘅唔係大酒樓乜乜乜，而係The One新開嘅潮人點心店「点心代表」。

雪梨咸水角（4隻）$29

本來店裡原本賣「紅蘿蔔鹹水角」，但中秋將至，店裡改為賣雪梨咸水角，雖然外型唔同，但一樣咁好味。咸水角炸得香脆又唔油膩，免治豬肉做餡，每啖都夾有蝦米鹹香。

龍鬚鳳尾蝦（3隻）$49

龍鬚鳳尾蝦比得上酒樓婚宴級數，大大隻蝦配上墨魚膠，非常豐富！爽口的蝦肉配上開胃酸辣醬汁，真係冇得輸！

香炸流沙包（3個）$29

流沙包非常流心，一咬就有濃濃蛋黃香，加上師傅製作時加入少量好立克粉，令奶黃汁更滑更香。

青芥脆蝦漢堡仔（2個）$29

蝦餅炸得香脆，而且同甜甜嘅青芥辣醬非常配合，唯獨漢堡包皮烘得略硬，有點不好咬。

米菲白兔（4隻）$29

白兔棉花糖香甜軟綿，配上椰絲味道更香濃。

柚香茶凍（4件）$29

用上泰國金柚、紅茶再加西柚肉製成。先將原個柚子開邊起肉，然後倒入果凍，再加入柚子皮，雪藏後就食得，食落有粒粒西柚肉，再帶有點點柚子的甘甜。

草莓大福（4件）$29

草莓鮮甜，配上濃厚的紅豆，非常好味，糯米外皮亦有咬口，推薦！

地點︰尖沙咀彌敦道100號The ONE 3樓L308號舖
電話︰2885 1345
營業時間︰星期一至日: 11:00-23:00
價錢︰$101-$200