由台灣作家九把刀小說改編而成的《等一個人咖啡》早前熱爆，令全城捲起了咖啡熱潮。加上《等一個人咖啡》個名咁浪漫，唔少人都會一邊飲星巴乜，一邊打卡，順手Hashtage #等一個人咖啡，事實上，你估真係等愛情故事發生咁浪漫咩，Hashtage啲嘢，虛名嚟啫！

日本東京銀座最近就開咗一間專門畀顧客聯誼嘅Aiseki Cafe，唔係話專畀人搞啲咩Speed Dating，而係真真正正地等一個人，等邊個人？可能就係你嘅夢中情人。

當女孩子一入到Cafe，侍應就會將佢隨機帶去座位區，點杯咖啡，食個甜品，然後就等男生坐埋嚟傾下偈，認識下對方。而每30分鐘男生就必須換座位，所以人人都有機會，永不落空，唔怕成日淨係對住一個對象。而且呢度都唔似一般聯誼聚會，要包場或者預約，你隨時可以walk in，想嚟就嚟，想走就走；又唔需要刻意迫自己同人social，如果你唔想同啲男士講嘢，大可以睇睇放喺枱上嘅書同漫畫Hea時間。成件事真係好似平日入間Cafe飲杯嘢咁relax，只不過呢個地方另外有個purpose，就係畀單身嘅大家識朋友。所以就算你唔想搵朋友，單係點杯咖啡食個甜品，都冇問題，但咁樣Hea足成日，只係for女性囉。

點解咁講？因為為咗吸引女性光顧，女生只需要畀$500元日幣，就可以全日享受無限量飲品，係無限量呀！喺一般Cafe點杯最平嘅Latte都要980元日幣，女生喺呢度Hea真係抵到爛！不過男生就唔同講法，單係入場一小時就要$2500元日幣，如果想留耐啲，每小時仲要加$1000元日幣，所以入得嚟又留得耐嘅男士，荷包都要有返咁上下彈藥。