其實「Japanese Soba Noodles 蔦」喺東京一直好有名氣，雖然佢由2012年先開業，唔係咩老牌子麵店，舖頭又喺角落位，地理位置唔算好好，餐廳裡面又只得 9 個座位，每日只賣午市，由中午11點開門，賣晒就唔做，一星期只開五日，星期二、三都休息。即使係咁，都有大把本地人同外地遊客特登一早排隊嚟幫襯，可見佢嘅拉麵幾有吸引力！

咁究竟「Japanese Soba Noodles 蔦」嘅拉麵有咩過人之處呢？

其實佢嘅拉麵主要用兩種自家製麵條，一種係櫪木縣嘅小麥同全麥麵粉製成、加入內蒙古天然鹼水、法國產天然鹽等等嘅細麵條；另一種就係以日本產嘅中筋麵粉為主、加入兵庫縣產海鹽及長崎縣長期熟成燒酒製成嘅麵條。兩種麵條都各有特色，鍾意邊款就視乎個人口味。

而佢嘅湯頭就用雞骨、蜆、北海道産羅臼昆布、以及三重縣產嘅秋刀魚乾調和而成，整體味道清淡而層次豐富。