男士想增加雄性魅力，唔一定要飲鹿茸大補酒或者喪啪生蠔嘅。最近有科學研究指出，原來有一種日常生活中常見嘅食物，可以令男士散發更有魅力嘅體香，令佢哋更容易吸引異性注意。

仲記唔記得早幾日MenClub介紹過一款勁多人問津嘅大蒜撈麵？冇錯喇，嗰種令男人愈食愈Charm嘅神奇食物就係大蒜喇！

根據捷克嘅Charles University做咗一項實驗研究，佢哋首先搵咗兩組男士，一組就要食加咗12g大蒜嘅芝士三文治，而另一組就要食完全冇加大蒜嘅芝士三文治。之後限制實驗對象唔可以接觸會影響體味嘅嘢。然後請兩組人都喺腋下夾住一塊棉片12個鐘，之後將沾滿體味同汗液嘅棉片收集返。一星期之後，再將兩隻三文治對換，做多次同樣嘅實驗。

跟住再將棉片交畀女性聞過之後畀評語，結果發現，有食大蒜嘅組別嘅體味都得到較佳評價，唔少女性都覺得，佢哋嘅體味「有吸引力」、「令人愉快」又或者係「比較陽剛」等等。