新年流流就話唔好講衰嘢啫，新年之後提下應該唔怕啩？仲記唔記得新年時大家為咗魚蛋引發騷亂？雖然過往周街流動小販係香港嘅文化特色之一，但80年代起，政府因為市容同衞生等理由而停發小販牌照，並加強打擊無牌熟食小販，所以而家已經好難見到圍威喂幫襯小販檔嘅光景。

可能部分巴打細個住嘅地方冇乜流動小販檔，所以感受唔深，但如果係有小販檔陪伴成長嘅牛下巴打，就一定好深體會。Mean娜自細住青衣，青衣長發當年都係出晒名嘅「無牌熟食小販天堂」，仲好記得以前就算凌晨3、4點肚餓都唔怕冇嘢食，因為一落街，魚蛋雞翼尖碗仔翅大把選擇，你擔心自己帶唔夠錢好過啦，使怕食唔飽？相信牛下巴打都有呢種回憶，以前牛頭角下邨周地美食︰木頭車牛雜、臭豆腐、鹵味小食……一切都令人念念不忘，可惜自從牛頭角下邨清拆後，再搵唔返呢種令人懷念嘅味道。

不過喺呢個髦聞，如果巴打想回味昔日嘅牛頭角下邨，終於唔使再咁慘情「在回憶中找你」，因為九龍灣得寶商場地下，最近改建成為以牛下為主題嘅Food Court「牛下新城」，畀大家喺室內慢慢「掃街」。

「牛下新城」主打5、60年代懷舊Feel，一入到去已經感受到濃濃嘅復古味，就好似紙皮石地板、紅燈罩吊燈、廣告海報、舊式招牌等等裝潢設計，都令人有種回到過去嘅錯覺。

「牛下新城」話就話以牛下為主，不過其他特色美食。呢度總共有8間食店，例如牛下八座嘅牛雜店、台灣夜市小食、潮爆漢堡包、芝士撈麵、串燒等等，雖然係提供更多選擇，但總覺得加咗咁多Extra嘢，就唔夠「牛下」。

老老竇竇，「牛下新城」有咁多間舖咁多美食，Mean娜一個女仔加埋攝影師x1又邊食得晒丫？所以我哋淨係揀咗3間食店同大家分享～

先由賣台灣美食嘅「山豬茶集」開始，「山豬茶集」主要係賣台式飲品同夜市小食，例如鹽酥雞、甜不辣、糯米腸等等，Mean娜就買咗甜不辣同埋鹽酥雞。講落都覺得羞恥，其實Mean娜唔知甜不辣係咩，於是問問同行攝影師，佢同我講係炸蕃薯，好啦，Mean娜最愛有薯字嘅食物，所以滿心歡喜買咗咬返啖，當下先知原來甜不辣係炸魚漿。好，聽完白痴嘢，講返食物，雖然呢個甜不辣食落粉團味較重，但口感尚算彈牙，你話有冇魚味呢...Um...魚漿我係自己用眼睇出嚟嘅。

終於到主角出埸！喺「牛下新城」人流最多嘅「八座小食」，以前真係喺牛下推住木頭車擺檔架！當年老闆達哥嘅爸爸喺牛下8座對開球場賣咗廿幾年牛雜，勁多街坊幫襯，而家重出江湖，即刻成為「牛下新城」嘅王牌食店！Mean娜就叫咗佢哋嘅王牌臭豆腐同牛雜！

原來佢哋嘅牛雜一共用咗28種香料醃製，以自家秘方調製，牛雜包括︰牛膀、牛肺、大腸、粉腸同牛草肚，牛雜燜得又軟又入味，堅係正嘢！

P.S.Mean娜喺片中真係有眼不識泰山，以為沙嗲魚蛋會好似一般食嘅沙爹咁偏辣，第一啖咬「八座小食」嘅魚蛋，發覺特別甜，以為自己睇錯字，但原來佢哋嘅沙嗲魚蛋唔係咁簡單，係加咗陳皮入去，所以有種獨特嘅甘甜香味。

牛下新城 得米美食檔
地址：九龍灣牛頭角道3號TBG Mall得寶商場地下
營業時間：星期一至日：11:00-23:00
電話：3621 0744