喺香港地呢個乜都有得食嘅地方，要食和牛一啲都唔難，不過如果你係觀塘人（觀塘返工又好~住又好~成日嚟都好~）嘅話，就知道要喺觀塘呢片工業潮食區，食到日式燒和牛，仲要係靚嗰隻，就真係好難！

正宗頂級日式餐廳「西村日本料理」，近幾個月就喺觀塘開設咗日式燒肉店「萌MOE by Nishimura」，雖然叫得「萌」好似好QQ，令人聯想起女僕Cafe之類，但原來佢係主打日本各縣和牛燒肉，以及新派日本料理，聽講啲和牛仲係極罕有嘅優質，其中佢嘅「沖繩Motobu牛」，更於2013年至2015年，奪得日本全國畜農業協同組合頒發嘅「全國第一最優秀賞」，真係聽下都已經流晒口水！

「萌MOE by Nishimura」總面積超過2200呎，可以同時容納約60位客人，基本上，餐廳分為「立食零售區」同「室內用餐區」兩大部分，先同大家介紹一下「立食零售區」。

「立食零售區」主要提供和牛、來自日本各縣的生蠔，同埋多款創新日式和牛咖喱丼、便當及特色飯團等等，可以畀你堂食或者外賣。另外仲有新鮮空運到港嘅日本蔬菜，以及100%日本天然純果汁，有時返工經過呢度，不妨買便當之餘可以加多樽果汁，感受下百分百天然味道。

介紹完餐廳環境，係時候進入正題講講食物，不過唔好心急，先同你介紹一下特色前菜同海鮮先。

嚟到「萌MOE by Nishimura」，不得不試佢哋自創嘅新派前菜，其中呢款扮到雪糕咁樣嘅「MOE薯蓉沙律」最有驚喜，佢嘅薯蓉口感鬆軟順滑，配合脆卜卜雪糕筒，好味又特別！

講咗咁耐，終於講到重點——和牛喇～「萌MOE by Nishimura」嘅和牛由日本最南嘅沖繩縣、九州嘅宮崎縣及鹿兒島，到最北嘅北海道都有，佢定期購入原隻和牛，從中嚴選最Top部份，除咗頭先提到得過獎嘅「沖繩Motobu牛」外，仲有自從喺2007年於擁有「和牛奧運會」之稱嘅「日本全國和牛能力共進會」中獲得「總理大臣獎」最高殊榮，而家成為了日本國民所愛戴嘅新晉王道「宮崎牛」；以及生長環境得天獨厚，天然無污染，由專人飼養，以粟米、大麥、番薯及啤酒渣作為和牛飼料嘅日本正宗和牛原產地之一——鹿兒島和牛；仲有於北海道空氣清新怡人嘅大牧場飼養，以進食十勝鮮美牧草及麥蒿為主嘅優質飼料，擁有足夠的運動量，body勁perfect啂北海道和牛。

雖然啲和牛全部咁有背景，個個猛龍過江來勢洶洶咁，但「萌MOE by Nishimura」偏偏就鍾意搞搞新意思，唔幫佢哋改個霸氣名，反而改咗新穎又「萌」爆嘅QQ名，例如「沖繩Motobu陽光男神牛」、「宮崎暖男牛」、「鹿兒島特選之萌牛」（「至True初戀」牛肋肉、「萌萌女神牛」上肩胛及「至Pure美少女牛」薄切和牛）同「北海道Cool魔男神牛」。不過講問又講，其實「萌MOE by Nishimura」嘅「萌」，唔係指得意可愛，而係指萌生。

是次採訪，Mean娜就揀咗「沖繩Motobu陽光男神牛」燒肉拼盤，包括一口牛、上肩胛、上肋肉、西冷、肉眼；再搭配三種特製醬汁（柚子燒肉汁、鹽粷醬、蜜糖芥末汁）。

「沖繩Motobu陽光男神牛」嘅不飽和脂肪酸比例高達58%，細緻雪白花紋令肉質嫰滑鬆軟，入口即溶之餘，比其他和牛含更豐富肉味。

食完正餐千祈唔可以miss咗佢嘅甜品，佢嘅雕魚燒分紅豆及曲奇口味，外層係雕魚脆皮，裡面包住雪糕，烤完再食，外面熱辣辣脆卜卜，裡面凍冰冰軟綿綿，雙重感覺真係好正！

photo and video by Ricky@MenClub

地址: 觀塘駿業街56號中海日升中心1樓A號舖

電話：3974-5138

營業時間：12︰00 - 23︰00