【食過做專家】火鍋店食盡牛肉刁鑽位

文：MenClub William 圖：MenClub
POSTED ON 10 Nov 2016

打邊爐最緊要係咩？係牛肉呀！！！大哥，食牛肉都唔一定要大手大手淥，近期就有一間火鍋店，獨沽一味，超平價供應牛肉各個刁鑽部位，個個部位唔同質感同味道，逐塊細味，你會發現好似食緊幾款紅肉咁，好過癮！

封門柳、胸口膀、牛朴肉、金花趾、坑爪等等名字聽完頭頂冒「？？？」，其實係一隻牛嘅唔同部位，正常人聽完都一頭霧水，不過對於八位店主，已經成為日常用語。八位後生仔，愛吃火鍋，最初只想找個聚腳地，卻意外地認識了本地騸牯牛最大買手莫景雄雄哥，為他們供應最刁鑽嘅牛肉，結果造就了這間牛肉火鍋店，這已可堪稱美食界嘅完夢計劃。


刁鑽嘅肉位，平時即使行開街市都唔多見，依家一個地方可以一次食到，最重要係價錢唔貴，每碟都係$48，叫多幾碟都唔肉痛，簡直係將食牛嘅文化推廣落民間，即使9月才開店，至今晚晚爆場，10用尾已迅即在元朗開分店，足見香港地牛癡多的是。

嚟得牛肉專門店，當然要認識下唔同部位嘅牛肉啦，店主話齋：「一路食唔同部位，款款都唔同味，完全唔覺自己食嘅同一隻牛！」每個部位淥嘅時間都唔同，即刻同你精選下先！
坑爪：又名坑腩爪，即牛肋骨之間嘅肉條，肉質帶爽勁，煙韌有嚼頭，不像坑腩帶肥膏，淥 10-12秒最好，最能食到牛肉嘅甘甜。

牛心：牛嘅心臟，淥 8-10秒，食感最奇怪，因為味道似食緊潤（即係牛肝），臊味重，但食落口感完全是塊嫩牛肉，有趣！

牛朴肉：即「牛頸脊」，油花分佈均勻，肉味香甜濃郁，肉質柔嫩，最適合用黎打邊爐，基本上市面供應的上等打邊爐牛肉，最受歡迎。

金花趾：即「金錢展」，牛後腿嘅一條小肌肉平時牛展用嚟鹵，但呢度嘅金花趾相當嫩口，油花均勻，食落爽口，小弟最愛。

胸口膀：又名「牛胸尖」或「牛白肉」，是牛胸前脂肪，看似油膩，但入口出奇地爽口。食法也有趣，淥15秒就最爽脆，又或者淥3分鐘讓牛油滲出，慢慢嗒出油香。

全店只有一種湯鍋，就是用牛骨湯，湯頭清淡不濁，更能突顯牛肉的鮮味。擔心唔夠飽？食到尾加個烏冬落去，吸晒牛湯精華，好很好食！


沙漏唔係計你鐘，限你時間，而係提醒老細，若果沙漏漏完，碟牛肉仲未上嘅話，就要請客人食牛肉啦！

616 牛肉火鍋專門店元朗店地址：元朗西菁街9號富盛大廈地下95-100號舖（分店）營業時間：中午12點至凌晨2點電話：3702 0899 大埔店地址：大埔翠怡花園B座地下18號舖（總店）營業時間：下午6點至凌晨2點電話：3565 6878