眾所周知，日本係一個「長壽國家」，平均壽命高達80幾歲，更有80,000名超過100歲老人健在。一向有唔少研究分析日本人長壽原因，不外乎從飲食習慣、生活模式及醫療技術入手， 最近外媒《The Economist》報導顯示，日本人可能係透過均衡飲食而長壽。

雖然日本係「經濟合作暨發展組織（OCED）」中糖消費量最低國家之一，但如果將長壽原因，完全歸功於少食糖同唔跟西方飲食習慣就未免諗得太過簡單。事實上，最近有研究證明，日本人長壽其中一個關鍵原因可能正正就係飲食習慣隨著時間推演而變得「西方」（食得多肉同奶製品）。

（圖片截至：The Economist）

日本並唔係一直都係長壽冠軍，從圖表可以見到喺1970年，雖然日本癌症及心臟病水平比其他OCED國家低，但腦血管疾病死亡人數遠高於其他國家。直到1990年左石，腦血管疾病死亡人數先接近OCED國家平均水平，促使日本漸漸成為長壽國家。

（圖片截至：The Economist）

究竟日本人點樣喺20年之內克服腦血管疾病問題？哥本哈根大學教授Thomas Truelsen表示，除咗醫療技術提升咗之外，另一個原因可能係日本人飲食習慣改變。日本曾經有長達1200年嘅「禁肉」歷史，即使解禁咗咁耐，仍然相對比其他國家少食肉及奶製品。由於奶製品及肉含有同心臟病息息相關嘅飽和脂肪酸，食太多會影響健康，但食太少又會提供唔到足夠膽固醇應付血管壁所需。英國曾對48,000人進行一項研究，發現素食者對心臟病抵抗力異常地強，但較容易中風（腦血管疾病）。

因此，過往日本腦血管疾病死亡率高企原因可能在於少食奶製品及肉，但隨飲食文化改變食返多咗肉，肉類及奶製品年攝入量從零上升到接近52公斤（美國水平45%），腦血管疾病人數隨即跟住趺至OCED國家平均水平。講咗咁耐，簡單嚟講唔食肉雖然會無咩膽固醇少啲機會患上心臟病，但係會提血中風機率，要健康就需要均衡飲食。